Mınıstrlikti bólý birqatar baǵyttyń damýyna tyń serpin beredi – Ashat Aımaǵambetov

NUR-SULTAN. QazAqparat – Memleket basshysynyń eki mınıstrlik, ıaǵnı Oqý-aǵartý mınıstrligi men Ǵylym jáne joǵary bilim mınıstrligin qurý týraly sheshimi júıeni odan ári damytý úshin óte mańyzdy. Búginnen bastap oqý-aǵartý mınıstri bolǵan Ashat Aımaǵambetov áleýmettik jelidegi paraqshasynda oı bólisti, dep habarlaıdy QazAqparat.

«Sonymen qatar, bul sheshim Prezıdent Qasym-Jomart Kemeluly Toqaevtyń salany damytý boıynsha alǵa qoıǵan naqty mindetterin tıimdi oryndaýǵa múmkindik beredi. Mektepke deıingi, orta, qosymsha, tehnıkalyq jáne kásiptik bilim berý salasyndaǵy mindetter men syn-tegeýrinder aýqymy artyp keledi», - dep jazady mınıstr.

Joǵary bilim men ǵylym salasyna toqtalǵan vedomstvo basshysy «qazirdiń ózinde qol jetkizilgen nátıjeler kadrlar daıarlaý jáne ǵylymı óndiristi damytý úshin jańa, zor maqsat-mindetter qoıýǵa septigin tıgizgenin» aıtady.

«Bul reforma osy baǵyttardyń damýyna tyń serpin beredi. Sondaı-aq, joǵary kórsetkishter eki mınıstrliktiń tyǵyz yntymaqtastyǵyna baılanysty bolady», - dedi ol.

Ashat Aımaǵambetov úsh jyldyń ishinde mınıstrlik ujymynyń bilim salasyn da, ǵylym salasyn da jetildirý maqsatynda atqarǵan jumysy az emestigin jetkizdi. Barlyq zań men oń ózgeris ǵalymdardyń, pedagogterdiń, basqa da qyzmetkerlerdiń mártebesin kóterýge erekshe kóńil bólip otyrǵan Prezıdenttiń jeke qoldaýynyń arqasynda qabyldanǵanyna toqtaldy.

«Úsh jyl boıy Bilim jáne ǵylym mınıstri retinde atqarylǵan jumystar týraly esep bergen jón dep sanaımyn. Naqtyraq aıtqanda, sybaılas jemqorlyq táýekelderin joıý, ashyqtyq pen transparenttilikti qamtamasyz etý, bilim sapasy men ǵylymnyń áleýetin arttyrý baǵytynda qandaı sheshimder qabyldandy, qandaı derekter negizinde júrgizildi jáne jalpy qandaı jumystar atqarylǵany týraly esep bergen mańyzdy.

Birinshi kezekte Memleket basshysyna senim bildirip, Bilim jáne ǵylym mınıstri kezimde qoldaý kórsetkeni úshin alǵysymdy bildirgim keledi.

Sondaı-aq, bilim jáne ǵylym salasynyń qyzmetkerlerine, mınıstrliktiń, vedomstvolyq baǵynystaǵy uıymdardyń jáne ǵylymı uıymdardyń qyzmetkerlerine, JOO-nyń professorlyq-oqytýshylyq quramdaryna, oblystardyń departamentterine, bilim basqarmalaryna alǵys aıtamyn.

Elimizdiń pedagogterine qoldaý kórsetip, birlesip atqarǵan jumysy úshin alǵysym sheksiz.

Alda Jańa Qazaqstannyń damýy jolynda jańa mindetter men maqsattar tur», - dep túıindedi mınıstr.

Eske salsaq, Ashat Aımaǵambetov Qazaqstan Respýblıkasynyń Oqý-aǵartý mınıstri bolyp taǵaıyndaldy.