Mınıstrlikter úıi mańynda jurttyń úreıin ushyrǵan sómkeniń ıesi tabyldy
ASTANA. QazAqparat - Polıtseıler ІІD jedel basqarý ortalyǵynyń vıdeobaqylaý kameralarynyń kómegimen Máńgilik el dańǵyly men Dostyq kóshesiniń qıylysynda sómkesin qaldyryp ketken adamdy anyqtady, dep habarlaıdy QazAqparat tilshisi.
«28 jastaǵy er adamnyń aıtýynsha, ol kóligin avtoturaqqa qoıyp kelgen soń alý úshin sómkesin jaıaý júrginshiler jolynyń boıyna qaldyrǵan. Vıdeobaqylaý kameralarynyń kómegimen júrgizýshi Jol qozǵalysy erejesin buzǵany anyqtalyp, QR Ákimshilik quqyq buzýshylyq týraly kodeksiniń 594-baby («Jol qıylystarynan ótý qaǵıdalaryn buzý nemese joldyń júrý bóligin kesip ótý») jáne 595-baby («Manevr jasaý qaǵıdalaryn buzý») boıynsha ákimshilik jaýapqa tartyldy», - dep málimdedi ІІD baspasóz qyzmeti.
Búgin polıtsııa qyzmetkerleri kúdikti qytaı sómkesiniń tabylýyna baılanysty Mınıstrlikter úıin qorshaýǵa alǵany habarlanǵan bolatyn.
Sómkeni tekserý úshin oqıǵa ornyna birden mamandar joldanyp, tekserý kezinde atalmysh sómkeniń ishinen kúdikti eshteńe tabylmaǵan.
