Mınıstrlikten sertıfıkat alyp, jańa kólik satyp al

ALMATY. QazAqparat - Qazaqstandyqtar Qaraǵandyda eski kólikterdi kádege asyratyn zaýyt ashylǵaly beri 8 myń eski kóligin joıýǵa ótkizgen, dep habarlaıdy QazAqparat tilshisi.

Eski kólikterdi joıý maqsatynda satyp alý baǵdarlamasy 2017 jyly bastalǵan bolatyn.

Qazaqstan avtobıznesi qaýymdastyǵynyń vıtse-prezıdenti Anar Maqashevanyń aıtýynsha, endi qazaqstandyqtar eski kólikterin tıimdi sata alatyn boldy.

Sonymen qatar, qazaqstandyqtarǵa jańa kólik satyp alý úshin jeńildik sertıfıkaty berilmek.

Óndirýshilerdiń keńeıtilgen mindettemeleri (ÓKM) operatorynyń habarlaýynsha, ótken jyly 8 myń avtokólik ótkizilip, jeńildik sertıfıkattary tabystaldy. 5 myń sertıfıkat paıdalanylyp, 3 myń avtokólik satyp alynǵan.

«Kóbinese jeńil kólikter satyp alynýda. Zańdy tulǵalar da qyzyǵýshylyq tanytady dep úmittenemiz. Kólikti ótkizgennen keıin ne bolady? Óndiris kezeńine akkýmýlıatorlar men shınalar ketedi. Sosyn joıylatyn kólikterge breket qoıylady. Bul zaýyt 2017 jyly Qaraǵandyda ashyldy. 6 jeltoqsannan bastap iske qosyldy. Munymen jekemenshik kompanııa aınalysady», - dedi «ÓKM» operatory JShS satý bóliminiń jetekshisi Rysgúl Esdáýletova.

Statıstıka boıynsha, kóbinese VAZ 2101 (07) markasy joıýǵa ótkizilip jatyr. Eń kóne kólik 1946 jyly shyǵarylǵan eken.

Baǵdarlama aıasynda tolyq jınaqtalmaǵan kólik ótkizgen adamǵa 48 000 teńge kóleminde ótemaqy tólenedi. Tolyq ótkizilgen kólikke 150 000 teńge tólenedi.

Sonymen qatar, QR Energetıka mınıstrligi otandyq kólikterdi satyp alýǵa arnaıy jeńildik sertıfıkatyn taratyp jatyr.

Jeńil kólik alatyndarǵa 315 000 teńge, avtobýs alatyndarǵa - 450 000 teńge, júk kóligin alatyndarǵa 650 myń teńge kóleminde jeńildik beriledi.