Mınıstrlik jelide koronavırýsqa qatysty jalǵan aqparat tarap jatqanyn eskertti

NUR-SULTAN. QazAqparat – QR Densaýlyq saqtaý mınıstrligi Qytaıda taraǵan koronavırýsqa qatysty áleýmettik jelide taraǵan jalǵan aqparattarǵa senbeýge shaqyrady, dep habarlaıdy QazAqparat.

«Ózderińiz kórip otyrǵandaı, messendjerler men áleýmettik jelilerde qazirgi tańda Qytaıda 2,8 mln adam koronavırýs juqtyryp, 112 myń adamnyń kóz jumǵany týraly aqparat tarap jatyr. Bul aqparat – jalǵan!» - dedi Densaýlyq saqtaý mınıstrligi.

Mınıstrlik osy rette tek resmı aqparattarǵa sený kerektigin eskertedi.

«25 qańtardaǵy resmı málimetterge sáıkes, Qytaıdyń 30 provıntsııasynda (avtonomdy aýdandar men mýnıtsıpalıtetterde) juqtyrýdyń 1975 rastalǵan jaǵdaıy tirkeldi. Onyń ishinde 56 adam kóz jumǵan. 13 elde 34 jaǵdaı tirkelip otyr: Gonkongta – 5, Taılandta – 5, Taıvanda – 3, Malaızııada – 3, Sıngapýrda – 3, Frantsııada – 3, Japonııada – 2, O.Koreıada – 2, AQSh-ta – 2, Vetnamda – 2, Makaoda – 2, Nepalda – 1, Avstralııada – 1 jaǵdaı tirkelgen», - delingen habarlamada.

Eske salaıyq, búgin QR Prezıdenti Qasym-Jomart Toqaev Qytaıdan Qazaqstan aýmaǵyna koronavırýstyń taralýyna jol bermeý boıynsha naqty uıymdastyrý sharalaryn qabyldaýdy tapsyrǵan bolatyn. Osyǵan oraı Úkimet basshysy Asqar Mamın birqatar tapsyrma júktedi.

Qazir Qytaıda pnevmonııalyq ınfektsııanyń jańa túri tarap jatyr. Syrqatqa shaldyqqan jáne kóz jumǵandar sany kún sanap artyp keledi. Alǵashqy naýqastar tirkelgen kúnderi (15 qańtar) esepke 41 adam alynǵan bolatyn.