Mınıstrlik Jaıyqtyń lastanýy boıynsha júrgizilgen tekseris nátıjesin jarııalady

NUR-SULTAN. QazAqparat – QR Ekologııa, geologııa jáne tabıǵı resýrstar mınıstrligi Jaıyq ózeni jaǵalaýynyń lastanýy faktisi boıynsha júrgizilgen tekseris nátıjesi jónindegi aqparatty jarııalady, dep habarlaıdy QazAqparat mınsıtrliktiń Facebook-tegi paraqshasyna silteme jasap.

«Atyraý oblysy boıynsha ekologııa departamenti Jaıyq ózeni jaǵalaýynyń sý qorǵaý aımaǵynyń qaýipti hımııalyq zattarmen lastaný faktisi boıynsha «Neftegazovyı servısnyı alıans» JShS-ne qatysty jospardan tys tekserý júrgizdi. Atalǵan óndiristik bazanyń aýmaǵynda hımııalyq reagentterden bosatylǵan 220 EKS-EM markaly emýlgatory bar tolyq bóshkeler jáne 75 bóshkeler anyqtaldy. Sondaı-aq az mólsherde hımııalyq reagenttermen jerdiń lastanýy baıqaldy. Oral ózeni jaǵalaýynyń lastaný faktileri anyqtalǵan joq»,-delingen habarlamada.

Tekserý qorytyndysy boıynsha jerdi hımııalyq reagenttermen lastaý bóliginde zańbuzýshylyqtar, óndiris jáne tutyný qaldyqtarymen jumys isteý erejelerin buzý, atap aıtqanda qaýipti qaldyqtardy esepke alý men pasporttyń bolmaýy anyqtaldy.

«Jol berilgen zańbuzýshylyqtar úshin ákimshilik quqyq buzýshylyq týraly 4 hattama shyǵarylyp, qaýipti qaldyqtardy kádege jaratý jáne hımııalyq reagenttermen lastanǵan jer ýchaskesin tazalaý qajettigi týraly nusqama berildi. Sondaı-aq tekserý barysynda hımııalyq taldaý júrgizý úshin jerasty sýlarynyń synamalary men topyraq synamalary iriktelip alyndy, nátıjeleri boıynsha lastaýshy zattardyń shekti ruqsat etilgen shoǵyrlanýynyń artýy anyqtalmady»,-dep jazylǵan mınıstrlik taratqan aqparatta.

Sonymen qatar, Jaıyq ózeninen jer betindegi sýdyń synamasy alynǵan. Júrgizilgen synaqtar nátıjeleri boıynsha lastaýshy zattardyń shekti ruqsat etilgen shoǵyrlanýynan asýy anyqtalǵan joq.
Departament sot organdaryna qyzmetin toqtatý týraly talap-aryz beriledi.