Mınıstrlik «Jarqaıyń - Jańadala» jolyn jóndeýdi qarastyrady

ASTANA. QazAqparat - Úkimettiń búgingi otyrysynda «STV» arnasynyń operatory Tóretaı Álmambetov «Jarqaıyń - Jańadala» jolyn jóndeýge qatysty suraq qoıdy, dep habarlaıdy QazAqparat tilshisi.

«Aqmola oblysyndaǵy Jarqaıyń aýdany, ol burynǵy Derjavınskiden Jańadala aýylyna deıingi 40-50 shaqyrym jol egemendik alǵaly beri jóndelmedi. Jergilikti halyqtyń jol azaby qashan sheshiledi? Adamdar osyny surasyn dep tapsyrǵan edi», - dedi Tóretaı Álmambetov.

Oǵan QR Investıtsııalar jáne damý vıtse mınıstri Roman Sklıar resmı túrde jaýap berýge ýáde berdi. «Men sizdiń suraǵyńyzdy jazyp aldym. Sosyn mindetti túrde hatpen jaýap beremin», - dep atap kórsetti Sklıar.

Aıta keteıik, aǵymdaǵy jyly «Nurly jol» baǵdarlamasy aıasynda 4 400 shaqyrymdy quraıtyn 22 jobany júzege asyrý josparlanǵan. Jyldyń aıaǵyna deıin 600 shaqyrym jol paıdalanýǵa beriledi.