Mınıstrlik jańa qurylǵan oblystarda nege máslıhat saılaýy ótpegenin túsindirdi

NUR-SULTAN. QazAqparat – QR Ádilet mınıstriniń orynbasary Alma Muqanova qaıta qurylǵan oblystarda máslıhat depýtattary nege tikeleı saılaý arqyly iriktelmegenin túsindirdi, - dep habarlaıdy QazAqparat tilshisi.

«Jýyqta ǵana jańadan qurylǵan oblystardyń máslıhattary bólindi. Zańnama boıynsha bul protsess qalaı uıymdastyryldy? Nege máslıhat saılaýy bolǵan joq?» dep surady jýrnalıster.

Vıtse-mınıstrdiń aıtýyna qaraǵanda, qoldanystaǵy ákimshilik-aýmaqtyq qurylymdar týraly zańnamada máslıhattardy taratý týraly normalar joq bolǵan.

«Qazir osy joq normalardyń tóńireginde jumys istep jatyrmyz. Túzetýler paketine atalǵan normalardy engizbekshimiz. Qaıta qurylymdaý degen – jıyntyq uǵym. Birigýdi de, selbesýdi de, bólinýdi de qaıta qurylymdaý dep túsinýge bolady. Bul jerde 3 oblystyń alty oblysqa aınalǵanyn kórip otyrmyz. Osynyń bárin retteıtin tártiptiń bolmaýyna baılanysty máslıhattar qazirgi quramy boıynsha bóline saldy. Ulttyq ekonomıka mınıstrligi ondaǵy turatyn halyqtyń sany boıynsha tıisti jumys júrgizdi. Mandattardyń sany osy sanǵa sáıkes belgilendi», - dedi vıtse-mınıstr.

Aıtýynsha qaıta qurylymdalǵan oblystardyń máslıhattary kelesi saılaýda naqtylanýy múmkin.

«Mysaly, kelesi máslıhat saılaýynda Abaı oblysynda qansha mandat, Shyǵys Qazaqstan oblysynda qansha mandat bolatyny aıqyndalady. Kóshi-qon máselesin eskersek, mandattar sany ózgere beredi. Biz máslıhattardy qaıta qurylymdaý boıynsha jumys júrgizip jatyrmyz. Sonyń nátıjesinde keleside mundaı suraqtar týyndamaıdy. Qazirgi zańnamada oblystar qaıta qurylymdalǵan jaǵdaıda máslıhattar qaıtadan saılaý arqyly jasaqtalýy kerek pe, álde mandattar sany ózara bóliske túsýi kerek pe degen másele naqty kórsetilmegen. Osy olqylyqty joıý jumysyn júrgizip jatyrmyz», - dedi Alma Muqanova.

Sondaı-aq, ol Prezıdent týraly konstıtýtsııalyq zańda Nazarbaevqa kepildik beretin normalar bar ekenin eske saldy.