Mınıstrlik Úndistannan qaraǵandylyq áıeldi balalarymen qaıtarýǵa kómektesip jatyr

ASTANA. QazAqparat – Qazaqstannyń Syrtqy ister mınıstrligi Úndistannan qaraǵandylyq áıeldi balalarymen qaıtarýǵa kómektesip jatyr, dep habarlaıdy QazAqparat tilshisi.

Atap aıtqanda, «Ne molchı» qoryna Kalkýttada turyp jatqan qaraǵandylyq áıelden ótinish túsken. Ol 10 jastaǵy, 3,5 jáne 1,1 jastaǵy úsh balasymen atalǵan qalada turyp jatyr.

Taratylǵan málimetke qaraǵanda, atalǵan áıel otbasyndaǵy zorlyq-zombylyqtan zardap shegip jatqan kórinedi. Úsh balanyń anasy keıingi 4 jyl boıy ózin uryp-soǵyp, búkil otbasyn tutqynda ustaǵan kúıeýinen qutqarýdy ótinip otyr.

«Osy jerden ketýime kemektesińizder», - dep jazdy ol.

Atalǵan áıel balalarymen birge Qazaqstanǵa oralǵysy keledi. Alaıda kishkentaı eki balasynda vıza joq eken, al úlken qyzynda vızalyq rejımniń merzimi ótip ketken.

Óz kezeginde Qazaqstannyń Syrtqy ister mınıstrligi osy otbasynyń máselesimen konsýl aınalysyp jatqanyn jáne qujattaryn túgendeý bastalǵanyn jarııalady.

«Konsýl balalardyń anasymen baılanysqa shyǵyp, barlyq kómekti jasaıdy. Olardy Qazaqstanǵa qaıtarýǵa kómektesemiz», - delingen mınıstrlik málimetinde.