Mınıstrlik UBT-ǵa 10 smartfondy alyp ótpek bolǵan balaǵa qatysty túsinik berdi
ASTANA. QazAqparat - Atalǵan jaǵdaı Astanadaǵy test tapsyrý bólimshesinde bolǵan, dep xabarlaıdy QazAqparat tilshisi.
Ulttyq testileý ortalyǵynyń basshysy Ramazan Álimqulovtyń aıtýynsha, Lev Gýmılev atyndaǵy Eýrazııa ulttyq ýnıversıtetinde bir bala test tapsyrýǵa on uıaly telefondy alyp ótpekshi bolǵan. "Biraq atalǵan qurylǵylardyń bári aýdıtorııaǵa kirgenge deıin anyqtaldy. Barlyq telefondardy alyp qoıdy. Test tapsyrý kezinde ol smartfondy paıdalanǵan joq. Endi, respýblıka boıynsha uıaly telefondy paıdalanýdyń biren-saran jaǵdaılary bolǵan shyǵar. Alaıda eshkimdi aýdıtorııadan qýǵan joq. Baqylaýshylar birden eskertý jasap otyrdy", - dedi R.Álimqulov Astanada ótken baspasóz máslıxatynda.
Onyń sózine qaraǵanda, ulttyq biryńǵaı testileýdiń alǵashqy kúni bir adamnyń test nátıjesi joıyldy. "Ol jaǵdaı ońtústik óńirde bolǵan. Men atalǵan sheshimniń sebebin aıtpaı-aq qoıaıyn. Biraq ondaı jaǵdaılardyń bir ǵana sebebi bar. UBT-ny ótkizý erejeleri buzylǵan jaǵdaıda ǵana testtiń nátıjesi joıylady. Al mektep túlegin aýdıtorııadan shyǵaryp tastaıdy", - deıdi R.Álimqulov.
Osy oraıda ortalyq basshysy keıbir test jaýaptarynyń áleýmettik jelide jarııalanyp jatqanyna qatysty pikir bildirdi. Onyń aıtýynsha, biren-saran jaǵdaılar bar. "Biraq bizde mobıldik baılanysty óshiretin qurylǵylar istep jatyr. Bıyldan bastap barlyq qural-jabdyqtar jańartyldy. Sonyń arqasynda 4G sıgnalyn tolyǵymen basýǵa bolady. Bylaısha aıtqanda, mektep túlekteri test tapsyrmalaryn fotoǵa túsirip, jelige jibere almaıdy", - dep atap kórsetti R.Álimqulov.
Aıta keteıik, búgin QR Bilim jáne ǵylym mınıstrligi ulttyq biryńǵaı testileýdiń alǵashqy kúni boıynsha esep berdi. Oǵan sáıkes, eki myńnan astam túlek shekti upaıdy jınaı almady.
