Mınıstrlik tutynýshylardyń quqyǵyn qorǵaýda Qazaq KSR Zańynyń normasyn qoldanýdy usynady

ASTANA. QazAqparat – Qazaqstanda tutynýshylardyń quqyqtaryn qorǵaý jónindegi Ombýdsmen ınstıtýty engiziledi. Atalǵan saladaǵy máseleler talqylanǵan basqosýda baıandama jasaǵan Tutynýshylardyń quqyqtaryn qorǵaý komıtetiniń tóraǵasy Asqar Tynysbekov osylaı málimdedi, dep habarlaıdy QazAqparat tilshisi.

Asqar Tynysbekovtyń aıtýynsha, tutynýshylardyń quqyqtaryn qorǵaý maqsatynda komıtet «Tutynýshylardyń quqyqtaryn qorǵaý týraly» Zańǵa túzetýler engizbek.

«Ekinshi túzetýler paketiniń negizgi jańalyǵy - Ombýdsmen ınstıtýtynyń qurý. Ol quqyqtary buzylǵan tutynýshylardyń ótinishterin, saladaǵy júıelik máselelerdi memlekettiń birinshi tulǵalaryna tikeleı jetkizedi. Osyǵan uqsas ınstıtýttar Germanııa, Shvetsııada, AQSh jáne basqa elderde bar ekenin atap ótken jón.

Sonymen qosa, zańnyń bazalyq qaǵıdattaryn kásipkerlik sýbektileri kórsetetin qyzmetterdiń barlyq salalaryna áser etýi tıis. Qoldanystaǵy zań áleýmettik, medıtsınalyq, týrıstik jáne ózge de qyzmet salalaryna qoldanylmaıdy.

Munymen qatar, bıznes oryn alǵan olqylyqtardy sotqa deıin joıýdan bas tartsa, onda ınstıtýttyń paıdasy úshin aıyppul salatyn norma engizý qajet. Aıyppul somasy - 10%-dan 50%-ǵa deıin. Mundaı norma 1991 jylǵy 5 maýsymdaǵy «Tutynýshylardyń quqyqtaryn qorǵaý týraly» Qazaq KSR Zańynda bolǵan. Osyny qalpyna keltirý qajet», - dedi Asqar Tynysbekov.

Qosa ketsek, bıylǵy 10 aıda quqyǵy saqtalmaǵan tutynýshylardan túsken aryzdar byltyrmen salystyrǵanda 139 paıyzǵa ósken.