Mınıstrlik Talǵardaǵy medıtsınalyq mekemege tekserý júrgizbek

NUR-SULTAN. QazAqparat – Eńbek, áleýmettik qorǵaý jáne kóshi-qon komıtetiniń Almaty oblysy boıynsha aýmaqtyq departamenti Talǵar qalasynyń №4 medıtsınalyq–áleýmettik saraptama (MÁS) bóliminiń qyzmetkerlerine qatysty qyzmettik tergeý júrgizedi, dep habarlaıdy QazAqparat.

«Tekserý №4 MÁS bóliminiń qyzmet alýshylarynyń qyzmetkerlerdiń olarmen dóreki qarym-qatynas jasaýyna shaǵymdary negizinde bastalǵan. Árbir jaǵdaıdy qaraý barysynda MÁS barlyq bólimderinde ornatylǵan jabdyqta júrgiziletin aýdıo taspalar jáne beınejazbalar paıdalanylatyn bolady. Tekserý nátıjeleri týraly qosymsha habarlanady», - delingen QR Eńbek jáne halyqty áleýmettik qorǵaý mınıstrligi baspasóz qyzmetiniń málimetinde.

Buǵan deıin departamenttiń ádisnama jáne baqylaý bólimi №4 MÁS bóliminde kýálandyrýdan ótken jáne onda múgedek dep tanylmaǵan 5 azamattyń shaǵymy boıynsha kýálandyrý júrgizdi. Shaǵymdanǵan jaǵdaılardy qaraý nátıjeleri boıynsha qorytyndylar negizdi dep tanyldy, óıtkeni medıtsınalyq qujattardy obektıvti qaraý jáne taldaý kezinde azamattarda organızm fýnktsııalarynyń turaqty buzylýy jáne tirshilik áreketiniń shektelýi anyqtalǵan joq.