Mınıstrlik shetelge ketken ǵalymdardy qaıtarýǵa baǵyttalǵan baǵdarlama ázirlemek
ASTANA. QazAqparat – Ǵylym jáne joǵary bilim mınıstrligi shet memleketterge jumys isteýge ketken otandyq ǵalymdardy elge qalaı qaıtaratynyn málim etti, dep habarlaıdy QazAqparat tilshisi.
Atalǵan vedomstvodan keıingi 2 jylda qansha qazaqstandyq ǵalym ózge memleketterge jumys isteýge ketkenin surap, resmı saýal joldaǵan edik. Jaýap mynadaı: «Ǵalymdardyń elden ketýi boıynsha aqparat qalyptastyrylmaıdy. Qazaqstan Respýblıkasynda joǵary bilimdi jáne ǵylymdy damytýdyń 2023-2029 jyldarǵa arnalǵan tujyrymdamasy aıasynda ǵalymdardy elge qaıtarýǵa baǵyttalǵan baǵdarlama ázirleý kózdelgen».
Alaıda mınıstrlik shetelge tájirbıe jınaqtaýǵa ketkender jaıly statıstıkamen bólisti.
«2021-2022 jyldary 416 ǵalymǵa álemniń jetekshi ortalyqtarynda taǵylymdamadan ótýge granttar berildi. Qazirgi tańda taǵylymdamasyn aıaqtaǵan 257 ǵalym elge oraldy. Qalǵan ǵylymı qyzmetkerlerdiń taǵylymdama merzimi aıaqtalmady», - delingen mınıstrliktiń jaýabynda.
Eske salaıyq, buǵan deıin Ǵylym jáne joǵary bilim mınıstri Saıasat Nurbek Qazaqstan 10 jylda qansha ǵalymdy joǵaltqanyn aıtqan edi.
