Mınıstrlik Rıdderdegi JEO týraly: Ákimdik pen menshik ıesi kelise almaı jatyr

ASTANA. QazAqparat – Rıdder qalasyndaǵy jylý elektr ortalyǵynyń ıesi atalǵan obektini kommýnaldyq menshikke bergisi joq. Bul jaıynda Energetıka vıtse-mınıstri Jandos Nurmaǵanbetov málimdedi, dep habarlaıdy QazAqparat tilshisi.

«Oblys ákimdigi men JEO ıesiniń arasynda júrip jatqan kelissóz tyǵyryqqa tireldi. Bizdegi bar aqparat boıynsha, menshik ıesi obektini jaı ǵana bergisi kelmeıdi, satqysy keledi. Bizdińshe, menshik ıesi mindetin atqara almasa, demek áleýmettik ádilettilik bolýy kerek. Biz nelikten múshkil jaǵdaıdaǵy nysandy satyp alýymyz kerek?», - dedi Jandos Nurmaǵanbetov Senattyń qarjy jáne bıýdjet komıtetiniń otyrysynan keıin tilshilerdiń saýalyna jaýap bere turyp.

Sondaı-aq, Energetıka vıtse-mınıstri Pavlodar, Qaraǵandy, Petropavl jáne basqa da jylý elektr ortalyqtarynyń ıeleri ınvetıtsııa tartý, jóndeý jáne ortalyqtardy kelesi jylý maýsymyna daıyndaý boıynsha jumys júrgizip jatqanyn habarlady.

Aıta keteıik, Rıdder JEO-da byltyr qarasha aıynda bolǵan apattan keıin munda tótenshe jaǵdaı kúni búginge deıin qaıtalanyp keledi.

Máselen, bıyl 5 qańtarda JEO-da bager stantsııasy qaıtadan sý astynda qaldy. 19 qańtarda atalǵan ortalyqta órt shyqty. 28 aqpanda №1 jáne №2 qazandyqtar jumysy toqtatyldy.

21 naýryzda JEO-nyń eki qazandyǵy otqa orandy.

Osydan birneshe kún buryn Rıdder jylý elektr ortalyǵyna 11 mln teńge aıyppul salynǵan bolatyn.