Mınıstrlik Reseı arqyly elge oralatyn týrısterdi tasymaldaý tártibin túsindirdi

NUR-SULTAN. QazAqparat – QR Mádenıet jáne sport mınıstrligi týrızm ındýstrııasy komıtetiniń tóraǵasynyń mindetin atqarýshy Dastan Ryspekov Reseı arqyly elge oralatyn týrısterdiń charterlik reısine qatysty jaǵdaı týraly baıandady, dep habarlaıdy QazAqparat.

Onyń aıtýynsha, turaqty reıstermen 1879 adamnyń 1695-i Qazaqstanǵa qaıtyp keldi. Qazirgi ýaqytta sheteldegi 379 azamatty qaıtarý kerek, onyń ishinde 319 qazaqstandyq 23-shi naýryzǵa deıin Reseı arqyly tranzıtpen qaıtady.

«Sheteldik, sonyń ishinde qazaqstandyq azamattardyń Reseı Federatsııasy aýmaǵyna kirýine tyıym salý máselesi oryn aldy. Osyǵan baılanysty 19-20 naýryz aralyǵynda ushyp kelgen Qazaqstannyń 55 azamaty Reseı áýejaılarynyń tranzıt aımaǵynda kalyp, Qazaqstanǵa orala almady. Bul másele el basshylyǵy tarapynan sheshimin tapty. Aldaǵy 2-3 kún ishinde Reseı Federatsııasy arqyly elge tranzıtpen kele jatqan qazaqstandyq týrıster osyndaı qıyndyqtarǵa tap bolmaıdy dep úmittenemiz», - dep atap ótti spıker Ortalyq kommýnıkatsııalar qyzmetinde ótken onlaın brıfıngte.

Sonymen birge, komıtet ókili Reseı arqyly elge jetetin qazaqstandyqtarǵa jaılylyq pen yńǵaılylyqqa kepildik bere almaıtyndaryn aıtty.

«Jaılylyq pen yńǵaılylyqqa 100% kepildik bere almaımyz, sebebi elge oralý kezinde ártúrli elderden kelgen toptardy jınaqtaý biraz ýaqyt alýy múmkin. Mysaly, Domınıkana, Vetnam, Taıland, Kýba jáne basqa da elderden 5-30 adamǵa deıingi toptar ushyp keledi jáne ushaqty tıimdi baǵyttaý úshin olardy kem degende 100 adamnan turatyn topqa jınaý kerek. Barlyq reısterdi QR Úkimeti «Týrıstik Qamqor« qorynyń qarajaty esebinen uıymdastyratynyn atap ótken jón», - dedi Dastan Ryspekov.

Aıta keteıik, 18 naýryzdaǵy jaǵdaı boıynsha shetelde týrıstik opetorlar arqyly demalyp jatqan qazaqstandyqtar sany 5 914 adamdy quraǵan. Olardy qaıtarý úshin 18 naýryzdan 23 naýryzǵa deıin 19 charterlik reıs josparlanǵan.