Mınıstrlik pen «Qoǵamdyq baqylaý jáne monıtorıng» uıymy ekologııalyq problemalardy birlese anyqtaıdy
NUR-SULTAN. QazAqparat - QR Ekologııa, geologııa jáne tabıǵı resýrstar mınıstrligi men «Qoǵamdyq baqylaý jáne monıtorıng» respýblıkalyq qoǵamdyq birlestigi ekologııa, ósimdikter men janýarlar dúnıesin qorǵaý salasynda uzaq merzimdi áriptestik ornatý týraly Memorandýmǵa qol qoıdy, dep habarlaıdy QazAqparat.
Qoǵamdyq uıymdarmen tyǵyz baılanys «Halyq únine qulaq asatyn memleket» tujyrymdamasy negizinde júzege asyp otyr.
Kelisim aıasynda taraptar ártúrli tabıǵat qorǵaý aktsııalaryna jurtshylyqty tartyp, halyqtyń ekologııalyq mádenıetin arttyrý boıynsha jumystar atqarady. Ekologııa, ósimdikter men janýarlar dúnıesin qorǵaý salasyndaǵy quqyq buzýshylyqtardyń aldyn alýdyń birlesken is-sharalaryn júrgizedi.
Memorandýmǵa qol qoıý aıasynda uıym tóraıymy Saıda Taýkeleva el arasyndaǵy ekologııaǵa qatysty rezonansty problemalar jaıynda mınıstrlikti habardar etip, birge sheshimin tabýǵa atsalysýǵa daıyn ekenin jetkizdi. Almaty qalasy aýasynyń lastanýy, jylý elektr stantsııalaryn gazǵa kóshirýdiń tıimdiligin jurtshylyqqa túsindirý, Aqtóbe oblysy Bestamaq aýylyndaǵy shoshqa fermasyna halyqtyń narazylyǵy sııaqty ótkir turǵan máselelerdi atap ótti.
Mınıstr Maǵzum Myrzaǵalıev uıym ókilderiniń azamattyq pozıtsııasy úshin alǵys bildirip, halyq pen Úkimet arasynda kópir bolatyn birlestikpen tyǵyz qarym-qatynasta jumys isteýge daıyn ekenin aıtty.
