Mınıstrlik Pavlodar oblysyndaǵy úıdiń nelikten qulaǵanyn túsindirdi

NUR-SULTAN. QazAqparat – QR Indýstrııa jáne ınfraqurylymdyq damý mınıstrligi Pavlodar oblysynda úıdiń qulaýyna ne sebep bolǵanyn túsindirdi, dep habarlaıdy QazAqparat mınıstrliktiń Telegram kanalyna silteme jasap.

Aldyn ala derekter boıynsha Pavlodar qalasynyń sáýlet jáne qala qurylysy bólimi aýmaqtyń egjeı-tegjeıli jobalaý jospary ETJJ bolmaýyna qaramastan jer ýchaskesiniń nysanaly maqsaty ózgertilgen (avtoturaqtan KTÚ-ge) jáne (jobalaýǵa) bastapqy ruqsat qujattary berilgen.

Budan basqa, Pavlodar oblysynyń qala qurylysy jáne jerdi baqylaý basqarmasy osy obektige tıisti túrde kameraldyq baqylaý júrgizbegen.

Osylaısha, Komıtet tehnıkalyq qadaǵalaýdy júzege asyratyn tulǵa qurylys barysy týraly aı saıynǵy esepterin usynbaǵanyn anyqtady. Osy obektige bekitilgen tehnıkalyq qadaǵalaýdyń jaýapty sarapshysy Komıtet reestrine sáıkes kompanııaǵa 2019 jylǵy jeltoqsanda qabyldanyp jáne 2021 jylǵy sáýirde shyǵarylǵan.

Budan basqa, tehnıkalyq qadaǵalaý kompanııasynda 2021 jylǵy 19 naýryzda tehnıkalyq qadaǵalaýdy júzege asyrýǵa akkredıtteýdiń merzimi ótken.

Osylaısha, memlekettik sáýlet-qurylys baqylaý monıtorıngi barysynda osy faktilerdi anyqtap, qurylysty toqtatý boıynsha tıisti sharalar qabyldaýy kerek edi.

Sondaı-aq, qulaǵan úıge qarama-qarsy dál osyndaı úıdiń sol merdigermen («Elıt Servıs Plıýs» JShS) salynyp jatqanyn atap ótken jón.

«Búgingi tańda atalǵan másele boıynsha arnaıy komıssııa qurylyp, Komıtettiń ókili jergilikti jerge bardy. Sonymen qatar, jaýapty memlekettik organdardy tekserýge bastama jasalyp, olardyń nátıjeleri boıynsha tıisti sharalar qabyldanatyn bolady»,-delingen habarlamada.

Osyǵan deıin Pavlodarda salynyp jatqan ǵımarat qırap, úıindi astynda qalǵan 3 adam aýrýhanaǵa jetkizilgeni habarlanǵan edi.

https://kaz.inform.kz/news/pavlodarda-salynyp-zhatkan-gimarat-kirap-uyindi-astynda-kalgan-3-adam-auruhanaga-zhetkizildi_a3802337