Mınıstrlik óz pikirin oılanyp aıtqan durys - Jambyl oblysynyń ákimi
ASTANA. QazAqparat - Úkimettiń búgingi otyrysynda Jambyl oblysynyń ákimi Asqar Myrzaxmetov Aýyl sharýashylyǵy mınıstrliginiń "sany bar, sapasy joq kooperatıvter kóp" degen málimdemesimen kelispeıtinin jetkizdi, dep xabarlaıdy QazAqparat tilshisi.
"Jańa mınıstrliktiń baıandamasynda "sany bar, sapasy joq" degen pikir aıtyldy. Menińshe, bul jerde ondaı pikirdi oılanyp aıtqan durys sııaqty. Óıtkeni kooperatıvterdi qurý ol dúkennen satyp alatyn bir zat emes. Aldymen onyń bárin qaǵaz júzinde rásimdeý kerek. Rásimdegennen keıin, ótinim beriledi. Ótinim berilgennen keıin, ol qondyrǵylardy daıyndaý úshin keminde úsh-tórt aı kerek", - dedi A.Myrzaxmetov.
Ákimniń aıtýynsha, qarjylandyrý, kóbinese, ekinshi jartyjyldyqta bastalady. Sol sebepti jyldyń aıaǵyna deıin barlyq kooperatıvterdi texnıkalyq jaǵynan tastúıin qylý múmkin emes.
"Ótken jyl - ol alǵashqy pılottyq jyl. Sondyqtan onyń barlyǵynyń sapasy joq dep aıtý durys emes. Aldymen barlyq qajetti qondyrǵylardy alyp berý kerek", - dep atap kórsetti A.Myrzaxmetov.
Osy oraıda Úkimet basshysy Baqytjan Saǵyntaev oblys ákimi aıtqan máseleniń sheshimin Jambyl aımaǵynda barynsha kórsetýge keńes berdi.
"Asqar Isabekuly, ózińizdiń oıyńyzdy Jambyl oblysynyń baǵdarlamasy boıynsha úlken dárejede kórsetińiz, bárine sabaq bolsyn", - dedi B.Saǵyntaev.
Aıta keteıik, búgin Aýyl sharýashylyǵy mınıstrligi iri jáne usaq kooperatıvterdi biriktirip, osy saladaǵy jumysty jańasha júrgizýdi usyndy. Atap ótilgendeı, sapasyz kooperatıvter kóbeıip ketken. "Búginde 851 kooperatıvtiń ishinde tek 491-i ǵana qajetti texnıkamen jabdyqtalyp, aǵymdaǵy jylda ónim óndirýge daıyn. Al 360 kooperatıvte tıisti qural-jabdyqtar bolmaı shyqty. Ókinishke qaraı, jaǵdaıdy "sany bar, sapasy joq" dep aıtýǵa týra keledi", - dedi vıtse-mınıstr Arman Evnıev.
