Mınıstrlik Óskemenniń las aýasyn synaǵan bıshi jigitke jaýap berdi

NUR-SULTAN. QazAqparat – QR Ekologııa, geologııa jáne tabıǵı resýrstar vıtse-mınıstri Ahmetjan Pirimqulov reseılik «TNT-daǵy bı» shoýynda óner kórsetip, Óskemenniń ekologııasyna qatysty másele kótergen Shyńǵyshan Qabdyhalyqtyń synyna jaýap berdi, dep habarlaıdy QazAqparat tilshisi.

Aıta ketsek, osydan birneshe kún buryn reseılik «TNT-daǵy bı» shoýynda óner kórsetken Shyńǵyshan Qabdyhalyq Óskemen qalasynyń ekologııasyna qatysty atalmysh telearnada syn aıtqan edi. Jas jigit Reseıge keter aldynda eki qaryndasynyń jótelip, ystyǵy kóterilip, aýrýhanaǵa jatyp qalǵanyn, osynyń bári zaýyttar aýaǵa taratatyn las qaldyqtardyń kesirinen ekenin aıtady.

Bul máselege qatysty mınıstrliktiń ustanymy qandaı ekenin búgin OKQ-daǵy baspasóz máslıhatynda QR Ekologııa, geologııa jáne tabıǵı resýrstar vıtse-mınıstri Ahmetjan Pirimqulov aıtyp berdi

«Shyǵys Qazaqstan, Pavlodar, Qaraǵandy oblystaryndaǵy bul máselelerdi bilemiz. Qala ishinde úlken zaýyttar bar. Qazirgi tańda ekologııany jaqsartý maqsatynda kóp jumys istelip jatyr. Jańa ekologııalyq kodekste eń ozyq ári qoljetimdi tehnologııalardy engizý ádisimen másele birshama sheshiler dep oılaımyz. Óskemen, Pavlodar, Qaraǵandy qalalarynda qorshaǵan ortaǵa emıssııa kóptep shyǵarylady. Jańa ekologııalyq kodekstiń jańashyldyqtary osy máseleni sheshýi tıis», - dedi Ahmetjan Pirimqulov.

Eske sala ketsek, buǵan deıin Ahmetjan Pirimqulov jeltoqsan aıynda Parlamentke engiziletin jańa ekologııalyq kodeks jobasy qoldanystaǵy zańnamaǵa birqatar ózgeris engizýdi kózdeıtinin habarlaǵan edi.