Mınıstrlik olımpıadalyq sport túrlerin damytý dırektsııasy basshysynyń qamalýyna pikir bildirdi

ASTANA. QazAqparat – Mádenıet jáne sport mınıstrligi sport jáne dene shynyqtyrý isteri komıtetiniń tóraǵasy Erbol Myrzabosynov Astanada olımpıadalyq sport túrlerin damytý dırektsııa basshysynyń qarjy jymqyrdy degen kúdikke ilinip, qamaýǵa alynǵanyna qatysty pikir bildirdi, dep habarlaıdy QazAqparat tilshisi.

«Árıne, mundaı áreketter sporttyń damýyna kádimgideı tejeý. Іstiń mán-jaıy quzyrly organdardyń tergeý qorytyndysynan keıin belgili bolady. Ádilet bolmaǵan jerde sport damymaıdy. Bıýdjet qarajatyn jeke múddege paıdalanǵandar memleketke qarsy adamdar dep esepteımiz. Mınıstrlik tarapynan mundaı árekettermen kúresemiz. Ondaı oqıǵalardy boldyrmaýǵa tyrysamyz», - dedi Erbol Myrzabosynov elordada ótken Qazaq kuresi qaýymdastyǵynyń jıynynan keıin BAQ ókilderiniń saýalyna jaýap bere turyp.

Eske salaıyq, keshe Qarjy monıtorıngi agenttigi Astanada olımpıadalyq sport túrlerin damytý dırektsııa basshysynyń qamaýǵa alynǵanyn habarlaǵan edi.

Tergeý málimetterine sáıkes, aqsha jymqyrý 2020-2023 jyldar aralyǵynda shetelde de, respýblıka ishinde de oqý-jattyǵý men jarystarǵa bólingen is-sapar shyǵyndaryn asyra kórsetý arqyly jasalǵan.

Buǵan deıin Sport jáne dene shynyqtyrý isteri komıtetiniń basshysy boksshy Beıbit Shúmenovtiń kisi urý áreketine qatysty pikir bildirgen.