Mınıstrlik oqýshyny ıterip jibergen muǵalimge qatysty túsinik berdi

ASTANA. QazAqparat – Oqý-aǵartý mınıstrligi Astanada muǵalimniń 8 jasar oqýshyny ıterip jibergen áreketine qatysty túsinikteme berdi. Atalǵan oqıǵa beınebaqylaý kamerasyna túsip qalǵan, dep habarlaıdy QazAqparat tilshisi.

«Astanada bolǵan jaǵdaı bizge belgili. Bizdiń mınıstrlik áleýmettik jelilerdegi bilim berýge qatysty qoǵam nazaryn aýdartqan máselelerdi sheshýde ashyq jumys formatyn jalǵastyrady. Atalǵan fakti boıynsha qalalyq Bilim berý basqarmasy tıisti shara qabyldady. Muǵalimderdiń mártebesin qorǵaý bizdiń basty nazarda, ol zańmen qarastyrylǵan. Árıne, balalardyń quqyǵyn qorǵaý da zor mańyzǵa ıe. Bizdegi bar aqparat boıynsha Bilim basqarmasy muǵalimge qatań sógis jarııalady», - dedi Oqý-aǵartý mınıstriniń birinshi orynbasary Sholpan Karınova OKQ-de ótken brıfıngide BAQ ókilderiniń saýalyna jaýap bere otyryp.

Onyń aıtýynsha, osy sekildi oqıǵalar qaıtalanbaýy maqsatynda elordanyń bilim berý basqarmasymen tıisti jumystar júrgizildi.

Aıta ketsek, kúni keshe qalalyq bilim basqarmasy oqýshyny ıterip jibergen astanalyq muǵalimniń jumystan qýylǵanyn málim etken edi.

«Atalǵan oqıǵa boıynsha №27 mektep-lıtseıi qyzmettik tekserý júrgizdi. Tergeý barysynda 2-synyp oqýshysyna qatysty muǵalim tarapynan pedagogıka ádebine sáıkes kelmeıtin fakti rastaldy. QR Eńbek kodeksiniń 65-babynyń 1-tarmaǵyna sáıkes dene shynyqtyrý muǵalimine Pedagogıkalyq ádep jónindegi keńestiń usynymy negizinde qatań sógis jarııalandy.

Sonymen qatar, atalǵan mekteptiń 2023 jylǵy 30 qańtardaǵy «Jumystan bosatý týraly» №19 buıryǵyna sáıkes jáne QR Eńbek kodeksiniń 49-babynyń 5-tarmaǵyna sáıkes muǵalim jumystan shyǵaryldy», - degen habar aldyq Bilim basqarmasynan.

Sondaı-aq, bolǵan oqıǵaǵa qatysty qalalyq Polıtsııa departamenti tergeý júrgizip jatyr.