Mınıstrlik oqýlyq tapshylyǵyn tolyǵymen joımaq
ALMATY. QazAqparat -QR Bilim jáne ǵylym vıtse-mınıstri Bıbigúl Asanova oqýlyq jetispeýshiligi máselesine qatysty pikir bildirdi, dep habarlaıdy QazAqparat tilshisi.
«Oqýlyqtar máselesine kelsek, buǵan baǵyttalǵan shyǵyndardy jergilikti organ qarjylandyrady. Jan basyna shaqqandaǵy qarjylandyrýǵa oqýlyqtar kirmeıdi. Negizinen oqýlyq tapshylyǵy tek qyrkúıek-qazan aılarynda ǵana seziledi. Bul másele ákimdikterdiń qaraýynda»,- dedi vıtse-mınıstr Bıbigúl Asylova Almatyda ótken jıyn barysynda.
Ol jaqyn arada bilim salasyn tsıfrlandyrýǵa baılanysty oqýlyq tapshylyǵy máselesi de ózektiligin joıatynyna senimdi.
«Jańa mazmun boıynsha shyqqan oqýlyqtardyń elektrondy nusqasyn QR BǴM «Oqýlyq» ortalyǵynan alýǵa bolady. 2, 5, 7 synyp oqýlyqtary saıtta tur. 2018-2019 oqý jyldary 3, 6, 8 jáne 10 synyptarǵa arnalǵan, 2019-2020 oqý jyldarynyń - 4, 9, 11 synyp oqýlyqtary jarııalanatyn bolady»,- dedi vıtse-mınıstr.
Respýblıkalyq jekemenshik bilim berý uıymdary qaýymdastyǵynyń jetekshisi Roza Sadyqova jekemenshik mektep muǵalimderiniń bilimderin jetildirýge múmkindikterdiń bolmaı jatatyndyǵy týraly aıtty.
«Qazaqstanda muǵalimderdiń biliktiligin tek qana Órleý ınstıtýty ótkizedi. Bizdiń muǵalimderdiń Órleýden sertıfıkaty bolmaǵandyqtan, attestatsııa kezinde kóp qıyndyqtar týyndaıdy», - dedi Roza Sadyqova.
Vıtse-mınıstr jekemenshik bilim berý uıymdarynyń máselesi jaqyn arada oń sheshimin tabatynyn aıtty.
Onyń sózine qaraǵanda, Úkimet jan basyna shaqqandaǵy qarjylandyrý júıesin engizý arqyly jekemenshik mektepterdiń qurylysyn yntalandyrýǵa nıetti.
Eske sala keteıik, búgingi otyrys barysynda jekemenshik jáne memlekettik mektepterdegi jan basyna shaqqandaǵy qarjylandyrý máselesi qozǵaldy.
