Mınıstrlik Nura ózenine laı sýdyń aǵyzylýyna qatysty túsinik berdi

QARAǴANDY. QazAqparat - Qaraǵandy oblysynyń ekologııa departamenti Nura ózenine lastanǵan sý qaldyqtaryn tógý faktisin tekserýde. Qazirgi ýaqytta ekologtar sýdan synama aldy. Sondaı-aq jergilikti bılik óndiristik qaldyqtar ózenge ne sebepti tógilgenin anyqtaýda, dep habarlaıdy QazAqparat tilshisi.

11 aqpanda Qaraǵandynyń tanymal pablıkteriniń birinde «Bassel Group LLS» JShS kúl úıindisiniń aǵyndy sýlary Nura ózenine aǵyp jatqany týraly vıdeo jarııalandy.

Bul aqparatqa qatysty QR Ekologııa, geologııa jáne tabıǵı resýrstar mınıstrligi túsinik berdi.

«Bıylǵy 11 aqpanda saǵat 17:57-de «Bassel Group LLS« JShS kúl úıindisiniń bógetin tekserý barysynda ruqsat etilmegen aǵyndy sýlardyń tógilýi anyqtaldy. Aǵyzýdyń sebebi temperatýranyń tómendeýimen birge, qar men muz massalarynyń aıtarlyqtaı qysymy bolǵan. Osylaısha, shyǵarý qudyǵynyń artqy qabyrǵasynyń dánekerlengen tigisi deformatsııalanyp, nátıjesinde Nura ózeniniń basseınine ruqsatsyz aǵý oryn alǵan. Kásiporyn tez arada qaqpaq tetigin jaýyp, aǵýdy toqtatty», - delingen mınıstrlik málimetinde.
Sondaı-aq atap ótilgendeı, kásiporyn qudyqtyń qabyrǵasyn qalpyna keltirý jáne tolyǵymen konservatsııalaý boıynsha jumystar júrgizý úshin «StoýnNaýsGrýpp» JShS (sýda júzý qyzmeti) mamandandyrylǵan uıymnyń basshylyǵymen kelissózder júrgizgen.

«Apat ornyna Qaraǵandy oblysy boıynsha Ekologııa departamentiniń jáne «Sý resýrstaryn paıdalanýdy retteý jáne qorǵaý jónindegi Nura-Sarysý basseındik ınspektsııasy« RMM ókilderi, Temirtaý qalasy ákiminiń orynbasary, Qaraǵandy oblysynyń Tótenshe jaǵdaılar departamenti barǵan. Ekologııa departamentiniń zerthanalyq-analıtıkalyq baqylaý bólimi sý synamalaryn aldy. Jedel sharalar qabyldanyp, apat joıyldy. Sonymen qatar, ekologııa departamenti «Bassel Group LLS« JShS-ǵa qatysty jospardan tys tekserý júrgizetin bolady», - dedi vedomstvodan.