Mınıstrlik Naýryz meıramynda aýqymdy is-sharalar uıymdastyrmaýǵa shaqyrdy

NUR-SULTAN. QazAqparat – QR Densaýlyq saqtaý birinshi vıtse-mınıstri Marat Shoranov naýryz aıynda KVI-diń taralý úrdisine qatysty pikir bildirdi, dep habarlaıdy QazAqparat tilshisi.

Ortalyq kommýnıkatsııalar qyzmetinde naýryz-sáýir aılarynda koronavırýstyń taralýy kórsetkishine qatysty suraq qoıyldy.

«Jalpy, qazirgi jáne aqpan aıyndaǵy jaǵdaıǵa qarap, naýryz jáne aldaǵy aıda 15 myńnan 20 myńǵa deıin naýqas bolýy múmkin degen esepteýler jasalyp otyr. Degenmen, barlyǵy ózimizge baılanysty. Naýryzda biraz mereke kúnderi qamtylǵan», - dep toqtaldy birinshi vıtse-mınıstr.

Osy oraıda ol ótken Jańa jyldyq merekeleýden keıingi eki aptadan soń bizde naýqastardyń sany kóbeıgenin atap ótti.

«Sondyqtan úlken toılardy jasamaýǵa, iri merekelik is-sharalardy uıymdastyrmaýǵa shaqyramyz. Naýryz meıramyn otbasy múshelerimen ǵana atap ótken durys bolady. Sondyqtan maska taǵyp, áleýmettik qashyqtyqtyqty saqtaǵan abzal», - dedi M. Shoranov.