Mınıstrlik Meıirgúlge: Ata-anań vıza rásimdese Qazaqstanǵa esh kedergisiz kele alady
ASTANA. QazAqparat - Elimizdiń kóshi-qon zańnamasyn buzǵany úshin Qazaqstan aýmaǵynan shyǵarylǵan 9 jastaǵy Meıirgúl Ularbektiń ata-anasy vıza rásimdep, esh kedergisiz kele alady. Bul jaıynda QazAqparat tilshisine QR Іshki ister mınıstrligi Memlekettik til jáne aqparat departamentiniń dırektory Almas Sadýbaev málim etti.
«Meıirgúl Ularbektiń ata-anasy Qytaı Halyq Respýblıkasynyń azamattary jáne olar aǵymdaǵy jyldyń 8 tamyzynda Almaty qalalyq mamandandyrylǵan aýdanaralyq ákimshilik sotynyń qaýlysymen belgilengen merzimde elden shyǵyp ketýden jaltarǵany úshin ákimshilik jaýapqa tartyldy. 14 tamyzda olar Qazaqstannan ketti. Qazirgi ýaqytta ІІM tarapynan olardyń Qazaqstanǵa kelýine eshqandaı shekteý joq. QHR-daǵy Qazaqstan Respýblıkasynyń Elshiliginde vıza rásimdegen jaǵdaıda olar Qazaqstanǵa esh kedergisiz kele alady. Joǵaryda atalǵan QHR azamattary turaqty turý máselesimen júgingen emes», - dedi Almas Sadýbaev.
Esterińizge sala ketsek, keshe 9 jastaǵy Meıirgúldiń Іshki ister mınıstri Qalmuhambet Qasymovtyń qabyldaýynda bolyp ata-anasynyń Qazaqstan zańnamasyn buzǵany úshin el aýmaǵynan shyǵarylǵandyǵyn aıtyp, kómek suraǵanyn jazǵan bolatynbyz.
