Mınıstrlik mektepterdegi býllıngpen kúres erejelerin bekitpek

ASTANA. QazAqparat – Oqý-aǵartý mınıstrligi bilim berý uıymdaryndaǵy býllıngtiń aldyn alý erejelerin bekitýdi usyndy. Jábir kórsetý máselesin sheshý joldary aıqyndalǵan qujat «Ashyq» NQA portalynda jarııalandy, dep habarlaıdy QazAqparat tilshisi.

Qujatta kórsetligendeı, býllıngtiń aldyn alý úshin bilim berý uıymynyń basshysy oqý jylynyń basynda jospar ázirleıdi. Oǵan sáıkes, atqarylatyn jumystardyń merzimi, nátıjeleri men oǵan jaýapty mamandar bekitiledi.

Josparǵa saı, myna sharalar qolǵa alynady:

- býllıngtiń aldyn alý máseleleri boıynsha bilim alýshylar men tárbıelenýshilerge aqparattyq-túsindirý jumystaryn júrgizý;

- bilim alýshylar men tárbıelenýshilerdi, balanyń zańdy ókilderin balany jábirleýge jol berilmeıtindigi týraly jazbasha jáne aýyzsha nysanda habardar etý;

- býllıng belgilerine shaǵymdanǵan bilim alýshylar men tárbıelenýshilerdiń aryzyna dereý den qoıý;

- bilim alýshylar men tárbıelenýshilerdiń tárbıe protsesi men bilim berý ortasynyń jaǵdaılaryna monıtorıng júrgizý.

Jergilikti atqarýshy organǵa ne bilim berý uıymyna balany jábirleý týraly aqparat túsken boıda jaýapty tulǵa shaǵymdy esepke alý jýrnalyna tirkeıdi. Keıin bul jaǵdaı 1 kún ishinde basshyǵa jetkiziledi.

«Aqparat kelip túskennen keıin bir jumys kúni ishinde synyp jetekshisin, pedagog-psıhologty tarta otyryp, býllıngke ushyraǵan balamen, sondaı-aq jábir kórsetýshimen jáne olardyń zańdy ókilderimen áńgime júrgizedi. Jınalǵan derekter negizinde 2 jumys kúni ishinde balany jábirleýdi taný nemese moıyndamaý týraly sheshim qabyldanady. Osy aralyqta býllıngke baılanysty janjaldy beıbit jolmen retteý jóninde sharalar qabyldaý usynylady. Eger medıtsınalyq aıǵaqtar bolsa, zardap shekken balaǵa medıtsınalyq kómek kórsetiledi», - delingen qujatta.

Ereje boıynsha býllıng faktisi anyqtalǵan kezde bilim berý, densaýlyq saqtaý uıymdary dereý ishki ister organdaryna jazbasha habarlama joldaıdy. Quzyrly organ jaǵdaıdy zerttep, qylmystyq is qozǵaý nemese odan bas tartý týraly sheshim qabyldaıdy.

Qujatta jazylǵandaı, jábir kórsetken bala mektepishilik esepke alynyp, onyń minez-qulqyna 6 aı monıtorıng júrgiziledi. Osy aralyqta oń ózgeris baıqalmasa, onda býlıng bastamashysy týraly aqparat kámeletke tolmaǵandar isteri jónindegi komıssııaǵa jiberiledi.