Mınıstrlik mektep formasyna taǵy da ózgeris engizbek

ASTANA. QazAqparat – Oqý-aǵartý mınıstrligi mektep formasyna taǵy da ózgeris engizbek. Onyń tártipteri men erejeleri ashyq talqyǵa shyǵarylǵan vedomstvonyń buıryǵynda jazylǵan, dep habarlaıdy QazAqparat tilshisi.

Mınıstrliktiń usynysy boıynsha endi uldarǵa kúndelikti jeıde, túımeleri bar nemese toqylǵan kúrte, kardıgan, polo jeıde jáne tennıska kııýge bolady. Al qys mezgilinde trıkotaj jılet pen vodolazkaǵa ruqsat etiledi. Qyzdarǵa da osy talap qoıylady. Degenmen qys mezgilinde olarǵa trıkotaj jılet, vodolazkadan bólek, sarafan kııý usynylady.

«Bul ýaqytqa deıin bolǵan merekede uldardyń kúndelikti formaǵa qosymsha aq jeıde, qyzdardyń aq tústi blýzka kıýi týraly norma alynyp tastalady. Sonymen qatar, mektep formasynyń negizgi túsine sáıkes keletin galstýk tigý talaby da alynyp tastalady», - dep kórsetilgen buıryqta.

Qujatta jazylǵandaı, bilim basqarmalary ata-analarǵa mektep formasyn otandyq óndirýshilerden satyp alýdy usynady. Desek te bul oraıda jekelegen óndirýshilerine artyqshylyq berýge bolmaıdy. Jańa ózgeriske ata-analardyń óndirýshini tańdaýda jáne mektep formasyn satyp alýda táýelsiz ekenin aıqyndaıtyn redaktsııa engizilgen.

Buıryqqa sáıkes, mektep formasy týraly máselelerdi talqylaýǵa balalardyń ata-analary jáne ózge de zańdy ókilderi men mektep tarapynan jaýapty tulǵalar qatysyp, sheshim qabyldaıdy.

Qujat 15 qarashaǵa deıin ashyq talqylaýǵa shyǵarylǵan.