Mınıstrlik LRT qurylysyn aıaqtaýǵa qarjy qaıdan alynatynyn túsindirdi

NUR-SULTAN. QazAqparat – QR Qarjy vıtse-mınıstri Tatıana Saveleva elordalyqtardy alańdatqan LRT qurylysyna qarjy qaıdan bólinetinin aıtty, dep habarlaıdy QazAqparat tilshisi.

«Qujattamaǵa qajetti búkil is-sharalar aıaqtalǵannan keıin qarjy qarastyramyz. Aqsha Úkimet rezervinen bólinbeıtin shyǵar. Indýstrııa jáne ınfraqurylymdyq damý mınıstrligi boıynsha bıýdjettik baǵdarlamalar qaıtadan bólinedi. Tıisti transfertter qosylady. Munyń bári kelesi jyly bıýdjetti naqtylaıtyn kezde bolady. Barlyq qujattama qajetti protsedýralardan ótti. Birqatar kórsetkish qaıta qaraldy. Zańnamanyń búkil talaby saqtaldy. Qazir pysyqtalyp jatyr. Odan keıin qarjylandyrýǵa eshqandaı kedergi bolmaıdy», - dedi vıtse-mınıstr BAQ ókilderiniń LRT qurylysyna qatysty saýalyna oraı.

Sonymen qatar ol jýrnalısterdiń «Prezıdent jobany odan ary jalǵastyrýǵa veto qoımaı ma?» degen saýalyna da jaýap berdi.

«Prezıdent úshin jaýap berip, sheshim shyǵara almaımyz. Degenmen, máseleniń jaı-japsary Úkimet ishinde jáne ákimmen tolyq talqylandy. Barlyq materıal Prezıdentke usynyldy. Resmı hat almasý boldy. Barlyǵy qalaı júzege asatyny Prezıdentpen kelisilgen», - dedi Tatıana Saveleva.