Mınıstrlik lıtsenzııasynan aıyrylǵan ýnıversıtetterge qatysty túsinik berdi
«2019 jyly Aımaqtyq áleýmettik-ınnovatsııalyq ýnıversıtetinde Qazaqstan Respýblıkasynyń bilim berý salasyndaǵy zańnamasynyń saqtalýyna eki ret tekserý júrgizilgen bolatyn. Alaıda joǵary oqý orny QR BǴM Bilim jáne ǵylym salasyndaǵy sapany qamtamasyz etý jónindegi komıtettiń uıǵarymyn oryndamaǵan. Osyǵan baılanysty Komıtet ýnıversıtetti bilim berý qyzmetin júrgizý quqyǵyna lıtsenzııadan aıyrý úshin sotqa júgindi. 2020 jyldyń 9 qańtarynda Shymkent qalasynyń mamandandyrylǵan ákimshilik soty komıtettiń nusqamasyn qanaǵattandyryp, joǵary oqý ornyn lıtsenzııadan aıyrý týraly sheshim qabyldady (sheshim áli zańdy kúshine engen joq)»,- delingen vedomstvo habarlamasynda.
Osyǵan baılanysty mınıstrlik oqýdy jalǵastyrý úshin stýdentterdi basqa joǵary oqý oryndaryna aýystyrý jóninde sharalar qabyldaıtyn bolady. Bul maqsatta jumys toby quryldy. Aýdarý zańnamaǵa sáıkes demalys ýaqytynda júzege asyrylady.
«QR «Bilim týraly» Zańynyń 42 baby 2 t. sáıkes bilim berý uıymy bilim berý qyzmetimen aınalysýǵa lıtsenzııasynan aıyrylǵan nemese taratylǵan jaǵdaıda onyń quryltaıshysy (quryltaıshylary) bilim alýshylardy oqýyn jalǵastyrý úshin basqa bilim berý uıymdaryna aýystyrýǵa sharalar qoldanady. 2020 jyldyń 1 aqpanyna deıin QR BǴM-men qabyldanǵan sheshim boıynsha qosymsha habarlanatyn bolady. Stýdentterdiń quqyqtary men múddelerin qorǵaý maqsatynda usynylatyn bilim berý qyzmetteriniń sapasyna nazar aýdarýlaryńyzdy suraımyz», - dep atalyp ótken habarlamada.
Jospardan tys tekserý qorytyndysy boıynsha ýnıversıtettiń bilim berý qyzmetinde óreskel ereje buzýshylyqtar anyqtalǵan bolatyn. Atap aıtqanda, talapkerlerdi shyǵarmashylyq emtıhandarsyz, 086-Ý nysanyndaǵy medıtsınalyq anyqtamasyz, UBT sertıfıkatynyń túpnusqasynsyz jáne beıindi pánderdi esepke almaı qabyldaý faktileri anyqtalǵan. Sondaı-aq, sabaq kestesin saqtamaý faktileri anyqtaldy.
