Mınıstrlik lıtsenzııasy qaıtarylǵan JOO stýdentterine qandaı jaǵdaı jasalatynyn túsindirdi
«Eger JOO-da belgili bir baǵyt boıynsha sapaly bilim berý úshin jetkilikti resýrstary, materıaldyq-tehnıkalyq bazasy, oqytýshylary bolmasa, onda ol stýdentterdi oqyta almaıdy. Mundaı jaǵdaılarda biz birden bas lıtsenzııany emes, belgili bir daıyndyq baǵyty boıynsha lıtsenzııany qaıtaryp alamyz. Mysal retinde bolashaq muǵalimderdi daıarlaý boıynsha aıtýǵa bolady. Eger bir jyl buryn elimizde 86 joǵary oqý orny pedagog daıarlaǵan bolsa, búgingi tańda olardyń sany 60-qa deıin qysqardy», – dedi Bilim jáne ǵylym mınıstri Ashat Aımaǵambetov.
Sonymen qatar, JOO tolyq jabylǵan jaǵdaıda, onda oqyǵan stýdentter basqa oqý oryndaryna aýystyrylady. Bul rette olardyń granttary men stıpendııalary saqtalady. Aqyly negizde oqyǵan stýdentter úshin aýysyp barǵan JOO-da oqý quny da burynǵy deńgeıde qalady.
«Grantta oqyǵandardyń granttary saqtalady. Aqyly negizde oqyǵandar oqý aqysyn burynǵy deńgeıde tóleıdi, keıbir JOO-lar tipti oqý qunyn tómendetti. Olar ózderiniń bilim berý traektorııasy, bilim berý baǵdarlamasy boıynsha oqýyn jalǵastyryp jatyr. Bul jumystardyń barlyǵy tıisti túrde júrgiziledi», – dedi mınıstr.
