Mınıstrlik qyzmetkeri jalaqysynyń kóptigine shaǵymdanǵan
ASTANA. QazAqparat - Kıprdiń energetıka, aýyl sharýashylyǵy men týrızm mınıstrliginiń qyzmetkeri prezıdentke ózine shamadan tys jalaqy beriletindigine shaǵymdana otyryp hat joldady, dep habarlaıdy Bı-Bı-Sı agenttigi.
Hatynda Marıosa Drýshıotıs sońǵy jyldary eshqandaı jumys istemegenin keltire ketken. Naqtylaı ketsek, qyzmetkerge basshylyq eshbir tapsyrma bermegen, ári ol da eshteńe tyndyrmaǵan. Bir jyl ishinde onyń qolynan birde bir qujat ótpegen.
Sheneýnik óziniń joǵary jalaqy alatyn qyzmetkerler sanatyna jatatynyn málimdegen. Frans press agenttiginiń habarlaýynsha, Kıprde osyndaı deńgeıdegi qyzmetkerdiń aılyq jalaqysy 5 myń eýro eken, alaıda eldegi ortasha jalaqy bir jarym myń eýrodan aspaıdy.
Drýshıotıs eshteńe tyndyrmaıtyn bolǵandyqtan, jumysqa kelýdiń ózi artyq dep sanaıdy, óıtkeni ol keńsede bolmasa jylytý jáne elektr qýatyn únemdeýge bolady eken.
Ázirge prezıdent baspasóz qyzmeti hatqa oraı jaýap bermegen, al mınıstrlik basshylyǵy Drýshıotıstiń laýazymy mańyzdy dep málim etti.
