Mınıstrlik qytaılyq vırýs «juqtyrǵan» banandar týraly aqparatty teriske shyǵardy

NUR-SULTAN. QazAqparat – QR Densaýlyq saqtaý vıtse-mınıstri Kamaljan Nadyrov áleýmettik jelidegi qytaılyq vırýs «juqtyrǵan» banandar týraly pikir bildirdi, dep habarlaıdy QazAqparat tilshisi.

«Messendjerler men áleýmettik jelide túrli jalǵan aqparattar tarap jatyr. Ásirese, banandar arqyly koronavırýsty juqtyrýǵa bolatyny jazylǵan. Bul aqparattyń shyndyqqa janaspaıtynyn resmı túrde málimdegimiz keledi», - dedi vıtse-mınıstr SQ «Farmatsııa» alańynda ótken baspasóz máslıhatynda.

Onyń aıtýynsha, resmı derekkózderge ǵana senim artqan jón.

«Bul másele boıynsha QR Densaýlyq saqtaý mınıstrligi quzyrly organdarǵa júgindi. Kinálilerdi taýyp, jalǵan aqparat taratqany úshin jaýapqa tartylǵanyn qalaımyz. Qylmystyq kodeks aıasynda shyndyqqa janaspaıtyn aqparat taratýdyń zańmen qýdalanatynyn eske salǵymyz keledi», - dedi K. Nadyrov.

Buǵan deıin Qazaqstannyń bas sanıtarlyq dárigeri Jandarbek Bekshın Ýhan qalasynan Almaty áýejaıyna qonǵan ushaq týraly pikir bildirgen edi.