Mınıstrlik qurylys salasyndaǵy ruqsat berý júıesiniń jańa tásilin usyndy

ASTANA. QazAqparat - «Ashyq saǵat alańy» jobasy aıasynda QR Indýstrııa jáne ınfraqurylymdyq damý mınıstrligi Qurylys isteri jáne Turǵyn úı- kommýnaldyq sharýashylyq komıtetinde bıznes qaýymdastyq jáne jergilikti atqarýshy organdar ókilderiniń qatysýymen onlaın formatta kezdesý ótti. Jıynda bilikti merdigerlik uıymdardyń tizilimin engizý máseleleri talqylandy, dep habarlaıdy QazAqparat mınıstrliktiń baspasóz qyzmetine silteme jasap.

Lıtsenzııalaý jáne attestattaý monıtorıngi jáne baqylaý basqarmasynyń bas sarapshysy Murat Nurmanov atap ótkendeı, qurylys naryǵyndaǵy qazirgi jaǵdaıdan lıtsenzııalaý júıesi qurylys uıymdarynyń biliktilik dárejesin jetkilikti dárejede kórsetpeıtinin baıqaýǵa bolady. Jalpy elimiz boıynsha tıisti lıtsenzııalary bar 90 myńnan astam qurylys jáne jobalaý kompanııalary jumys isteıdi.

«Berilgen lıtsenzııalardyń qoldanystaǵy tizilimi qurylys uıymynyń bilikti personalmen, materıaldyq-tehnıkalyq bazamen jáne qarjy resýrstarymen qamtylýy jáne jumys tájirıbesi boıynsha málimetterdi kórsetpeıdi. Osyǵan baılanysty biz «bilikti merdigerlik uıymdardyń tizilimi» uǵymyn engizý arqyly qurylys salasyndaǵy ruqsat berý júıesiniń jańa tásilin usynamyz», – dep atap ótti basqarmanyń bas sarapshysy Murat Nurmanov.

Bul tizilimdi E-Qurylys aqparattyq júıesi bazasynda avtomatty rejımde engizý josparlanǵan. Bul óz kezeginde memlekettik organdardyń ıntegratsııalanǵan aqparattyq júıelerinen alynǵan málimetterdi kórsetedi jáne merdiger uıym týraly tehnıkalyq málimetterdiń tolyq paketin qamtıdy.

Usynylyp otyrǵan bastama qurylys qyzmetteri naryǵyn bilikti emes merdiger uıymdardan bosatyp, merdiger qurylys kompanııalaryna belgilengen talaptarǵa sáıkes kelmegen jaǵdaıda tizilimnen shyǵarýdy avtomattandyrýǵa, sol arqyly qurylys protsesinde sapa máselesine basa nazar aýdarýǵa múmkindik bermek.