Mınıstrlik keıbir mekteptegi ınternet jyldamdyǵynyń tómendigine qatysty túsinikteme berdi

ASTANA. QazAqparat – Oqý-aǵartý mınıstrligi keıbir mektepterdegi ınternet jyldamdyǵynyń tómendigine qatysty túsinikteme berdi, dep habarlaıdy QazAqparat.

Aıta keteıik, keshe Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın keıbir mekteptegi sapasyz ınternettiń sebebin aıtqan edi.

«Mektepterdi qarjylandyrý ákimdikterdiń quzyrynda. Sáıkesinshe, mektepterdi ınternetpen qamtamasyz etýge qarjyny óńirlerdiń ákimdikteri men máslıhattary bóledi. Mektepterde ınternet jyldamdyǵynyń tómendiginiń birneshe sebebi bar. Olardyń ishinde tehnıkalyq jaǵdaılardyń joqtyǵy (optıkalyq talshyqty jeliler jáne t.b.). Sonymen qatar keıbir mektepterde joǵary jyldamdyqty ınternetke qosylýǵa tehnıkalyq múmkindik bar. Biraq onyń joqtyǵy mektep dırektorlarynyń únemdeýinen emes, ákimdikter men máslıhattardyń mektepterdi qajetti tarıftik josparǵa qosý úshin joǵary sapaly ınternetke bastapqyda jetkilikti kólemde qarjy bólmeıtindiginen. Bul jerde árıne, ákimdikterden bólingen qarajattyń jetispeýshiliginen mektep dırektory nemese bilim bóliminiń basshysy joǵary jyldamdyqty ınternetpen qamtamasyz ete almaıdy», - delingen mınıstrlik habarlamasynda.

Sondaı-aq mınıstrlik ákimdikterge mektep ishinde Wi-Fi jáne jergilikti jelilerdi ornatý úshin qosymsha qarajat bólýdi usynýda.