Mınıstrlik qaıtys bolǵan dárigerlerdiń otbasyna 10 mln teńge tóleý jaıyn túsindirdi

NUR-SULTAN. QazAqparat – Covid-19 indetinen qaıtys bolǵan medıtsına qyzmetkerleriniń otbasyna 10 mln teńge somasynda ótemaqy tólenip jatyr. Bul týraly Ortalyq kommýnıkatsııalar qyzmetinde QR Densaýlyq saqtaý mınıstrliginiń resmı ókili Baǵdat Qojahmetov málim etti, dep habarlaıdy QazAqparat tilshisi.

Osy oraıda resmı ókil qaıtys bolǵan medıtsına qyzmetkerleriniń týystaryna ótemaqyny barynsha jedel tóleýdi qamtamasyz etý úshin tıisti sheshim jasalǵanyn jetkizdi.

«Bul ótemaqy qaıtys bolǵan medıtsına qyzmetkeriniń týysyna tólenedi, ıaǵnı tıisti ótinimdi bergen jaqynyna beriledi. Eger muragerlikke úmitker basqa týystary shyqsa, onda bul máseleni qarastyrý Qazaqstan Respýblıkasynyń zańnamasy aıasynda iske asyrylady», - dedi B. Qojahmetov.

Budan buryn habarlanǵandaı, shilde aıynyń qorytyndysy boıynsha 78 myń medıtsına qyzmetkeriniń eńbekaqysyna ústeme beriledi.