Mınıstrlik Kaspıı teńizindegi ıtbalyq ólimine qatysty túsinikteme berdi

ASTANA. QazAqparat – 28 maýsymda Aqtaý qalasyndaǵy Kaspıı teńizi jaǵasyndaǵy demalys ornynan 2 óli ıtbalyq tabylǵany týraly aqparat taraǵan bolatyn. Ekologııa jáne tabıǵı resýrstar mınıstrligi bul aqparattyń shyndyqqa janaspaıtynyn málimdedi, dep habarlaıdy QazAqparat.

«Ózara is-qımyl shemasyna sáıkes, tabıǵat qorǵaý prokýratýrasy, mamandandyrylǵan ǵylymı uıymdardyń ókilderi, Kaspıı ıtbalyǵyn zertteý jáne ońaltý ortalyǵy, oblystyń veterınarııalyq qyzmeti, ekologııa departamentteri jáne quqyq qorǵaý organdary kiretin jumys tobynyń barlyq músheleri jedel túrde habardar etildi», – dedi mınıstrlikten.

29 maýsym kúni tańerteń jergilikti balyq ınspektsııasy basqarmasy, ekologııa departamenti, veterınarlyq qyzmet jáne Qazgıdromet qyzmetkerleri boljamdy orynǵa barǵan. Alaıda ol jerde ıtbalyq ólekseleri tabylmaǵan.

Qazir oblystyq balyq ınspektsııasy basqarmasynyń ınspektorlary ıtbalyq ólekselerin anyqtaý maqsatynda Kaspıı teńiziniń jaǵalaýyna monıtorıng júrgizip jatyr.