Mınıstrlik qantqa qatysty jaǵdaıdy retteý úshin ne istep jatyr
«Bul saladaǵy jaǵdaıdy ózgertý úshin tıisti sharalar qabyldanyp jatyr. Qazaqstan Respýblıkasynyń otandyq qant naryǵyndaǵy jaǵdaıdy turaqtandyrý jónindegi 2022 – 2026 jyldarǵa arnalǵan is-sharalar jospary ázirlendi», - delingen mınıstrliktiń QazAqparat agenttigine bergen jaýabynda.
Sonymen qatar bul saladaǵy máselelerge qatysty fermerlermen jáne zaýyt ıelerimen kezdesýler ótkizilip, kelissózder júrgizildi.
«Osy oraıda zaýyttardyń satyp alý baǵasyn tonnasyna 3-5 myń teńgege ulǵaıta otyryp, 15 myń teńgege deıin jetkizý týraly kelisimge qol jetkizildi. Bul rette oblys ákimdikteri tarapynan sýbsıdııalaý normatıvi de 15 myń teńgege deıin ulǵaıdy. Sýbsıdııalardy tóleý óńdeýshi kásiporynǵa óńdeýge tapsyrylǵan nemese óziniń óńdeýshi qurylymdaryna óńdeýge berilgen qant qyzylshasy óniminiń tonnasy úshin júzege asyrylady. Bul sharalar qant qyzylshasyn ósirýdiń rentabeldigin saqtaýǵa múmkindik beredi», - dep atalyp ótken vedomstvo málimetinde.
Munymen qosa, sýmen qamtamasyz etý boıynsha baǵdarlamalar qabyldanady.
«Sý tapshylyǵy problemasyn sheshý baǵytynda sýdy únemdeý tehnologııalaryn keńinen engizý qarastyrylǵan. Tamshylatyp sýarý jáne jańbyrlatyp sýarý júıelerin satyp alýǵa arnalǵan jeńildikpen nesıe berý baǵdarlamasy engizilip jatyr. Budan bólek, jabdyqty satyp alýǵa salynǵan ınvestıtsııalardyń 50 paıyzyn qaıtarýdy, sondaı-aq barlyq qajetti ınfraqurylymdy júrgizýdi kózdeıtin sýbsıdııalaý baǵdarlamasy jalǵasady», - dep atalyp ótken vedomstvo málimetinde.
Atap aıtqanda, qant qyzylshasyn óńdep-ósirýge basqa óńirlerdi tartý máseleleri qarastyrylyp jatyr. Ertis-Qaraǵandy kanaly aımaǵynda ınvestor esebinen jańa qant zaýytyn salý sııaqty máseleler qosymsha pysyqtalyp otyr.
«Qabyldanyp jatqan sharalar 2026 jylǵa qaraı qant qyzylshasynyń alqabyn 30 myń gektarǵa jetkizýge múmkindik beredi», - delingen mınıstrlik aqparatynda.
Budan buryn habarlanǵandaı, Aýyl sharýashylyǵy mınıstrligi qant qyzylshasy alqaptaryn keńeıtýge ne kedergi bolyp otyrǵanyn túsindirgen edi.
Bıyl Úkimettiń keńeıtilgen otyrysynda Prezıdent qant óńdeý zaýyttarynyń jumysy men qant qyzylshasy alqaptarynyń azaıǵanyn synǵa alǵan edi.
