Mınıstrlik Býrabaıdaǵy lagerde balanyń ólimine qatysty túsinik berdi
«Balalardyń quqyqtaryn qorǵaý komıteti tóraǵasynyń orynbasary Joldas Batyrhan lagerge bardy.
Balalardyń quqyqtaryn qorǵaý komıteti, bilim basqarmasy, quqyq qorǵaý organdarynyń ókilderinen turatyn arnaıy komıssııa quryldy.
Qazirgi tańda quqyq qorǵaý organdary tergeý sharalaryn júrgizip jatyr. Saraptama balanyń qaterli isikpen aýyrǵanyn kórsetti, onyń saldary ishki qan ketýdi týdyrǵan. Qurylǵan komıssııa jumysyn jalǵastyryp jatyr», - delingen mınıstrlik usynǵan málimette.
Sondaı-aq Oqý-aǵartý mınıstrligi otbasyna barlyq qajetti kómek kórsetiletinin, «Baldáýren» saýyqtyrý ortalyǵynyń jáne Balalardyń quqyqtaryn qorǵaý komıtetiniń ujymy balanyń týǵandary men jaqynyna qaıǵyra kóńil aıtatynyn jetkizdi.
Aqmola oblystyq Polıtsııa departamentiniń baspasóz qyzmetinen málim etkendeı, balanyń qazasy týraly búgin, 11 qańtarda, saǵat 06:36-da Býrabaı aýdandyq polıtsııa bólimine jedel járdem stantsııasynyń feldsheri habarlaǵan.
«Anyqtalǵandaı, jasóspirim 9 qańtarda Aqtóbe oblysynan Býrabaı aýdanyna balalar tobynyń quramynda kelgen. Qańtardyń 10-ynan 11-ine qaraǵan túni jasóspirim ishi aýyryp turǵanyn aıtqan. Tańerteń saǵat 05:00 shamasynda aýyrsynýdyń kúsheıýine baılanysty keshenniń medıtsınalyq bólimine júginip, jedel járdem shaqyrylǵan. Alaıda jedel járdem kelgenge deıin bala kóz jumǵan. Alǵashqy tekserý kezinde zorlyq-zombylyqtyń syrtqy belgileri baıqalǵan joq», - dedi vedomstvodan.
PD baspasóz qyzmetinen atap ótkendeı, atalǵan fakti Sotqa deıingi tergep-tekserýdiń biryńǵaı tizilimine tirkeldi, tıisti saraptamalar taǵaıyndaldy. Sondaı-aq oqý-saýyqtyrý ortalyǵynyń aýmaǵynda sanıtarlyq-epıdemıologııalyq qyzmet jumys istep jatyr.
