Mınıstrlik Beıbit Shúmenovtiń áreketine pikir bildirdi
ASTANA. QazAqparat – Mádenıet jáne sport mınıstrligi sport jáne dene shynyqtyrý isteri komıtetiniń tóraǵasy Erbol Myrzabosynov boksshy Beıbit Shúmenovtiń qoǵamdyq orynda kisini urý áreketine pikir bildirdi, dep habarlaıdy QazAqparat.
«Bizde sport ádebi bar, ol bekitilgen. Bul baǵytta sportshylarmen, bapkerler men jattyqtyrýshylarmen jáne jalpy ulttyq qurama múshelerimen turaqty jumys júrgiziledi. Ideologııalyq jumystar atqarylyp jatyr. Beıbit Shúmenov týraly oqıǵany estip, kórip jatyrmyz. Árıne, teris áreket, onyń ústine qoǵamdyq orynda bolyp otyr. Mundaı áreketterdi eshqalaı da qoldamaımyz», - dedi Erbol Myrzabosynov elordada ótken Qazaq kuresi qaýymdastyǵynyń jıynynan keıin tilshilerdiń saýalyna jaýap bere turyp.
Onyń aıtýynsha, jalpy qazaqstandyq sportshylardan alatyn úlgi kóp.
Buǵan deıin qolynda balasy bar er adamǵa judyryq ala júgirgen Beıbit Shúmenovtiń qatań jazaǵa tartylatyny týraly habarlaǵan edik.
«Qyzmettik tekserý júrip jatyr. Ol qatań jazaǵa tartylady. Kúni keshe mınıstr máseleni kóterdi, ol jazalanady», - degen edi Іshki ister mınıstriniń orynbasary Qaırat Súntaev Úkimet otyrysynan keıin BAQ ókilderiniń saýalyna jaýap bere turyp.
