Mınıstrlik Baıqońyr aýmaǵyndaǵy ekologııalyq jaǵdaıǵa túsinik berdi

ASTANA. QazAqparat - Parlament Májilisiniń jalpy otyrysynda QR Energetıka vıtse-mınıstri Sábıt Nurlybaı Baıqońyr aýmaǵynda qorshaǵan ortany qorǵaý sharalary týraly túsinik berdi, dep habarlaıdy QazAqparat tilshisi.

«Baıqońyr kesheniniń aımaǵynda ekologııa máselelerimen bizde Qyzylorda oblysynyń ekologııalyq departamentiniń bólimshesi aınalysady. Sol bólimshe atalǵan óńirde tıisti baqylaý sharalaryn atqarady. Atap aıtqanda, bekitilgen josparǵa sáıkes, bólimshe bıyl 20 mekemeni tekseredi. Sonymen qatar, «Qazgıdromettiń» onlaın rejimde tekserip turatyn eki arnaıy beketi bar», - dedi vıtse-mınıstr.

Onyń sózine qaraǵanda, zymyrandar qulaǵan jerlerdi qazaqstandyq «Ǵarysh-Ekologııa» ǵylymı-zertteý ortalyǵy men reseılik taǵy bir kásiporyn qaraıdy.

«Zymyran ushatyn kezde jáne jerge túskennen keıin atalǵan kásiporyndar tıisti jumystardy atqarady. Al biz (Energetıka mınıstrligi) keshen boıynsha ekologııalyq monıtorıngti júrgizip turamyz. Sonymen qatar bizde arnaıy keńes bar, onyń aıasynda jyl saıyn ushyrylǵan apparattar boıynsha búkil aqparat baıandalady. Atap aıtqanda, osy kúnge deıin radıatsııalyq fon jáne basqa da lastaýysh zattardyń deıgeıi normada tur dep baıandaı alamyz», - dedi S. Nurlybaı.

Osyǵan deıin Baıqońyrdaǵy «Zenıt» keshenine qatysty josparlar týraly jazdyq.