Mınıstrlik balalardy qorǵaý úshin 16 saıtty buǵattaýdy usyndy

ASTANA. QazAqparat – Qazaqstanda qolaısyz kontentti qamtıtyn jáne buǵattaýǵa usynylatyn saıttardyń «qara katalogy» quryldy. Bul týraly QR Aqparat jáne qoǵamdyq damý mınıstrligi Jastar jáne otbasy isteri komıtetiniń tóraǵasy Qaırat Baımýldınov aıtty, dep habarlaıdy QazAqparat.

«Qazirgi balalardyń biraz ýaqytty ınternette ótkizip, keńistikten aqparat alýy qalypty jaǵdaı. Onyń paıdasymen qatar zııandy jaqtaryn da eskergen jón. Áleýmettik zertteýlerge sáıkes, ata-analardyń 71,8%-y balalardy tárbıeleý protsesinde olardyń gadjetke, áleýmettik jelige, ınternetke táýeldiligi ózekti másele dep sanaıdy. Osy másele eskerilip, granttyq qarjylandyrý sheńberinde «Jastar men balalar arasynda ınternetke táýeldilik pen qumar oıyndardyń aldyn alý» áleýmettik jobasy iske astyń. Jobanyń maqsaty – jastardy ınternet-keńistiktegi qaýipsizdik erejelerin úıretý, ınternet pen qumar oıyndarǵa táýeldiliktiń aldyn alý úshin jaǵdaı jasaý», - dedi spıker Ortalyq kommýnıkatsııalar qyzmetinde ótken brıfıngte.

Joba aıasynda jastar men balalar arasynda fokýs-toptar saýalnamasy ótken jáne ınternetke táýeldilik, qumar oıyndar jáne kıberbýllıng deńgeıi joǵary óńirlerdi anyqtaý úshin óńirlerde úılestirýshiler taǵaıyndaldy.

Aqparattyq kýrstar men jobalardy iske asyrý, jastardy ınternet-keńistikte qaýipsiz júris-turys qaǵıdalaryna oqytý, kıberbýllıngtiń, ınternet-táýeldiliktiń jáne qumar oıyndarǵa táýeldiliktiń aldyn alý boıynsha aqparattyq-túsindirý materıaldaryn ázirleý maqsatynda beıne nusqaýlyqtar ázirlendi jáne uıymnyń áleýmettik jelilerindegi paraqshalarda jarııalanatyn bolady.

«Jelide qumar oıyndary bar saıttar anyqtalyp, paıdalanýshynyń «ata-ana baqylaýy» jeke kabınetterinde buǵattaýǵa usynylǵan 16 saıt anyqtaldy. Qolaısyz mazmundy qamtıtyn jáne buǵattaýǵa usynylatyn saıttardyń «qara katalogy» quryldy. Internet-táýeldiliktiń, balalar men jastarǵa arnalǵan kıberbýllıngtiń aldyn alý boıynsha onlaın kýrs ótkizildi, oǵan óńirlerden 200-den astam adam qatysty. Onlaın-kýrsqa qatysýshylardyń ortasha jasy 18 jasty qurady, al barlyq qatysýshylardyń 88% buryn kıberbýllıng pen ınternetke táýeldiliktiń aldyn alý boıynsha onlaın oqytýǵa qatyspaǵan», - dedi Q. Baımýldınov.

Aıta keteıik, Qazaqstanda balalardyń quqyqtary men múddelerin qorǵaýdy qamtamasyz etý maqsatynda 2022 jyl «Balalar jyly» dep jarııalandy.