Mınıstrlik áıelder men erlerdiń zeınetkerlik jasyn birdeı etý kerek degen máselege qatysty kózqarasyn bildirgen joq -Tamara Dúısenova
ASTANA. 23 qarasha. QazAqparat /Aıdar Ospanalıev/ - Áıelder men erlerdiń zeınetkerlik jasyn birdeı etý kerek degen máselege qatysty Eńbek jáne halyqty áleýmettik qorǵaý mınıstrligi eshqandaı kózqaras bildirgen joq.
Bul týraly búgin Parlament Senatynda qaralǵan zeınetaqymen qamtamasyz etý máselesine baılanysty zań jobasy boıynsha baıandama jasaǵan Eńbek jáne halyqty áleýmettik qorǵaý mınıstrliginiń Jaýapty hatshysy Tamara Dúısenova málim etti.
Onyń sózine qaraǵanda, áıelder men erlerdiń zeınetkerlik jasyn birdeı etý jónindegi máseleler Parlamentke kelgen zań jobasynda qaralmaǵan. «Áıelderdiń zeınetkerlik jasy ádettegisinshe - 58. Al er azamattardiki - 63. Jalpy bul másele Otbasy jáne áıelder isteri jónindegi ulttyq komıssııanyń otyrysynda kóterilgen. Al mınıstrlik oǵan qatysty óziniń kózqarasyn bildirgen joq», - dedi mınıstrlik ókili.
Onyń aıtýynsha, elimizdiń zeınetaqylyq jınaqtaý júıesi boıynsha azamattar aqshany neǵurlym kóbirek tapsa, olardyń alatyn zeınetaqylary da soǵurlym mol bolady. «Elimizdiń qoldanystaǵy zańnamalary boıynsha áıel azamatshalar ózderiniń zeınetaqylyq qorlaryn ári qaraı tolyqtyrǵysy kelse, olardyń bul isti erikti túrde jalǵastyrýǵa quqylary bar», - dedi T.Dúısenova.
