Mınıstrlik aýyldary aýyzsýǵa jarymaı otyrǵan óńirlerdi atady

NUR-SULTAN. QazAqparat – Elimizdegi úsh óńirdiń qala halqy 100 paıyz aýzysýmen qamtylǵan. Bul týraly QR Indýstrııa jáne ınfraqurylymdyq damý mınıstrligi Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Beıbit Shahanov aıtty, dep habarlaıdy QazAqparat tilshisi.

«2020 jyldyń qorytyndysy boıynsha eldegi sýmen jabdyqtaý qyzmetterine qoljetimdilik 94,1% qurady, onyń ishinde aýyldarda – 90,1%, qalalarda – 97,5%. Bul, 17,7 mıllıonnan astam adam degen sóz», - dedi ol Ortalyq kommýnıkatsııalar qyzmetine ótken brıfıngide.

Sondaı-aq, ol aımaqtardyń halyqty aýyzsýmen qamtamasyz etý kórsetkishterine toqtaldy.

«Soltústik Qazaqstan, Mańǵystaý jáne Atyraý oblystarynda qala halqy 100% sýmen jabdyqtaý qyzmetterimen qamtylǵan. Aýyzsýǵa eń tómen qoljetimdilik Jambyl oblysynda baıqalýda – 88,9%.

Sondaı-aq, aýyldyq jerlerdegi sýmen jabdyqtaýǵa eń joǵary qoljetimdilik Almaty (98,3%), Atyraý (98,5%) jáne Qyzylorda (97,6%) oblystarynda tirkeldi.

Aýyldyq jerlerdegi sýmen jabdyqtaýǵa eń tómengi qoljetimdilik Qostanaı (64,7%), Shyǵys Qazaqstan (81,4%), Soltústik Qazaqstan (82,2%) jáne Jambyl (82,2%) oblystarynda baıqalýda», - dedi komıtet ókili.