Mınıstrlik Almatydaǵy sport kolledji nelikten jabylǵanyn túsindirdi
NUR-SULTAN. QazAqparat – Almatydaǵy sport kolledji jabylady. Osyǵan qatysty QR Mádenıet jáne sport mınıstrligi resmı túsinik berdi, dep habarlaıdy QazAqparat tilshisi.
«Sport kolledjin jabý sheshimi álemdik tájirıbege súıene otyryp qabyldandy. Búginde Almatyda 2 respýblıkalyq jáne 1 qalalyq sport mektep-ınternaty bar. Kolledjde bilim alyp jatqan stýdentter osy atalǵan sport mektepterine aýystyrylady. Eshkim oqýsyz nemese jumyssyz qalmaıdy. Atalǵan jaıt mınıstrlik, komıtet tarapynan aldyn ala qarastyryldy», - dedi QR Mádenıet jáne sport mınıstrligi sport jáne dene shynyqtyrý isteri komıtetiniń tóraǵasy Samat Erǵalıev ortalyq kommýnıkatsııalar qyzmeti alańynda ótken baspasóz máslıhatynda.
Sport komıteti basshysynyń málimdeýinshe, atalǵan kolledjdiń aýmaǵynda jańa sporttyq nysan paıda bolmaq.
«Jabylatyn sport kolledjiniń aýmaǵynda Úkimet tarapynan qoldaý bolsa, sporttyq modýldik ınfraqurylym salý jospary bar. Ol jerde sportshylar tıisti deńgeıde jattyǵý múmkindigine ıe bolady. Al bapkerlerge kelsek, olar da jumyssyz qalmaıdy. Bapkerler «Shańyraq» jáne Káken Ahmetov atyndaǵy sport mektebi ınternatyna barady. Al keı bapkerler qalalyq sport mektepterinde jumysyn jalǵastyrmaq», - deıdi ol.
Aıta keteıik, Qazaqstanda sporttan akademııalyq jattyǵý ortalyǵy ashylady.
Odan bólek, atalǵan brıfıngte birneshe sport túri boıynsha bas bapkerlerdiń qyzmetinen bosatylǵany aıtyldy.
