Mınıstrlik alıment tólemeı júrgenderdi 5 táýlikke qamaýdy usyndy
NUR-SULTAN. QazAqparat – QR Іshki ister mınıstrligi jaýapkershilikten jaltarǵan alımentshilerdi bes táýlikke qamaýǵa alýdy usyndy, dep habarlaıdy QazAqparat tilshisi.
Búgin Parlament Májilisindegi Úkimet saǵatynda depýttar boryshker alıment tóleýshilerdi izdestirýdegi kemshilikter týraly aıtty. Belgili bolǵandaı, 2018 jyly 1864 alımentshige izdeýge jarııalanyp, onyń 78-i anyqtaldy.
Óz kezeginde Іshki ister mınıstriniń birinshi orynbasary Marat Qojaev boryshkerler el aýmaǵynda izdestiriletinin aıtty.
«Másele basqada, ıaǵnı bul adam qandaı tártipte izdestirilip jatyr? Bul adam azamattyq-quqyqtyq qatynastar isi boıynsha jaýapty bolǵandyqtan, izdestirý tetigi múldem basqa. Óıtkeni qylmyskerdi izdeý kezinde ózgeshe tártip eskerilgen. Biz boryshker alıment tóleýshini qamaýǵa almaımyz, tek sot oryndaýshysyna barýdy mindetteımiz», - dedi M. Qojaev.
Onyń sózine qaraǵanda, búginde alımentshige mindetin oryndaýǵa ıtermeleıtin eshqandaı sharalar qarastyrylmaǵan. Osyǵan baılanysty mınıstrlik Ákimshilik kodekste osy adamdarǵa jaýapkershilikti engizip, olardy ustaý múmkindigin qarastyrýdy usynyp otyr.
«Sot sheshimin oryndamaǵany úshin jaýapkershilikke toqtalsaq, bes táýlik merzimge qamaýǵa alýdy eskergen jón. Osy ýaqyt ishinde sot oryndaýshysy barlyq qajetti shekteý sharalaryn júrgize alady», - dedi Marat Qojaev.
Budan buryn habarlanǵandaı, Májilistegi Úkimet saǵatynda Marat Beketaev kelip túsken shaǵymdardyń jartysyn osy alımentti óndirip alý kategorııasy qamtyp otyrǵanyn aıtty.
