Mınıstrlik Áleýmettik medıtsınalyq saqtandyrý qorynyń qyzmetin tekseredi

NUR-SULTAN. QazAqparat - «Áleýmettik medıtsınalyq saqtandyrý qory» kommertsııalyq emes aktsıonerlik qoǵamynyń qyzmeti tyńǵylyqty zerdelenedi. Bul týraly QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

Ortalyq kommýnıkatsııalar qyzmetindegi brıfıng barysynda mınıstrge atalǵan qordyń basshysy Aıbatyr Jumaǵulovtyń jalaqysyna qatysty saýal qoıylǵan edi.

«Jyl saıyn aýdıtorlyq tekserý júrgizilip, odan keıin Densaýlyq saqtaý mınıstrligine usynylady. Jalaqyǵa nemese qordyń óziniń jumysyna qatysty aıtar bolsam, biz jumysqa kiristik. Qazir barlyǵyn zerdelep, materıaldardy kóteremiz. Qarjylyq kórsetkishterin, qor qyzmetin, strategııalyq baǵyttaryn zerdeleımiz», - dedi Alekseı Tsoı.

Sonymen qatar mınıstr bul máseleniń taıaý ýaqyttyń tyńǵylyqty zerdelenetindigin basa aıtty.

«Áriptesterimizdiń barlyǵy táýlik boıy rejımde jumys istep jatyr. 3-4 saǵat qana uıyqtaımyz. Búgingi kúndegi negizgi maqsatymyz - dári-dármek jetkizý, jelilerdi qamtamasyz etý. Degenmen, qor jumysyn da zerdelep baqylaýǵa alamyz», - dedi ol.

Aıta keteıik, sońǵy birneshe kúnde áleýmettik jelide Aıbatyr Jumaǵulovtyń jubaıynyń «joldasym 12-shi kólik syılady» dep jazǵan jazbasy qyzý talqyǵa túsip jatyr.