Mınıstrlik 20 myń tonna pııazdy eksportqa shyǵarý úshin kvota engizbek

ASTANA. QazAqparat – Aýyl sharýashylyǵy mınıstrligi sáýir aıynda 20 myń tonna pııazdy eksportqa shyǵarý boıynsha kvota engizýi múmkin. «Ashyq» NQA portalynda jarııalanǵan vedomstvo basshysynyń buıryǵynda osylaı jazylǵan, dep habarlaıdy QazAqparat tilshisi.

«20 000 tonna pııazdy Qazaqstan aýmaǵynan úshinshi memleketterge jáne Eýrazııalyq ekonomıkalyq odaq elderine áketýge 2023 jylǵy 28 sáýirge deıingi merzimge sandyq kvota engizilsin», - dep jazylǵan buıryqta.

Bul buıryq zańdy kúshine engen soń, ótinish bergen ár eksporttaýshyǵa 500 tonna lımıt beriledi.

«Qazaqstan aýmaǵynan taýarlardy áketýge arnalǵan kvota tolyq taýsylǵanǵa deıin júzege asyrylady», - dep túsindirme berilgen buıryqqa.

Qujat 29 naýryzǵa deıin kópshilik talqylaýda bolady.

Eske salaıyq, 17 qańtardan bastap Qazaqstannan pııaz eksporttaýǵa úsh aıǵa shekteý qoıylǵan bolatyn.

Birneshe kún buryn bul máselege qatysty pikir bildirgen Saýda jáne ıntegratsııa mınıstri Serik Jumanǵarın pııazdy elden shyǵarýǵa qoıylǵan tyıymdy alý bastamasy Úkimettiń kún tártibinde kóterilmegenin málimdedi.