Mınıstrlerdiń kólikteri bássaýdada satyla bastady
ASTANA. QazAqparat - Italııa premer-mınıstri Matteo Rentsı úkimetke qajeti joq dúnıelerden arylý naýqanyna bilek sybana kiristi. Ol eBay ınternet-bássaýdasyna Alfa Romeo, Lıancha jáne BMV avtokólikterin shyǵara bastady. Bul týraly rosbalt.ru habarlady.
Saıttyń jazýynsha, Rentsı 16 sáýirge deıin 151 kólikti satýdy josparlap otyrǵanyn aıtty. Onyń aıtýynsha, bul saýdadan úkimet tek paıda taýyp qana qoımaı, avtokólikterge tehnıkalyq qyzmet kórsetý men kútip-baptaýdan qyrýar qarajat únemdeıdi.
Bássaýdanyń alǵashqy saǵattarynda 2009 jyly shyǵyp, 141 163 shaqyrym júrgen BMV 525 kóligi 13 050 eýroǵa jáne 126 718 shaqyrym júrgen 2007 jylǵy Alfa Romeo 6 150 eýroǵa satylǵan.
Bul eki kólik te buryn Іshki ister mınıstrliginiń menshiginde bolǵan. Osy aptada úkimet bássaýdaǵa taǵy 25 kólikti qoıýy tıis.
Aıta keteıik, úkimet qaramaǵyndaǵy qyrýar avtokólik kópten beri ıtalııalyqtardyń narazylyǵyna ushyrap júrgen edi.
