Mınıstrlerdiń halyqpen kezdesýi men onyń nátıjelerine tıisti baǵalaý júrgiziledi
«Sizdiń 2022 jyldyń 9 tamyzyndaǵy Úkimet otyrysynda bergen tapsyrmalaryńyz ýaqtyly oryndaldy. Máselen, memlekettik organdardyń ashyqtyǵyn baǵalaý ádistemesine «Halyqpen kezdesý» atty jańa ındıkator engizildi. Endi mınıstrlerdiń halyqpen kezdesýi men onyń nátıjelerin Aqparat jáne qoǵamdyq damý mınıstrligi baǵalaıtyn bolady. Sondaı-aq, Jarlyq talaptaryna sáıkes, Úkimet qaýlysymen (2022 jylǵy 31 jeltoqsandaǵy № 1135) Ortalyq atqarýshy organ basshylarynyń halyqpen 2023 jylǵa arnalǵan kezdesý kestesi bekitildi», - dedi D. Qydyráli.
Sonymen qatar mınıstr byltyrǵy tájirıbeni negizge ala otyryp, halyqpen kezdesý jaıynda birneshe usynysty ortaǵa saldy.
«Birinshiden, mádenıet úılerinde jáne Ortalyq kommýnıkatsııalar qyzmetiniń alańdarynda ǵana halyqpen kezdesýmen shektelmeı, azamattardyń ótinishterinde kórsetilgen problemalyq mekenjaılarǵa baryp, jaǵdaıdy kózben kórgen abzal degen oıdamyz. Ekinshiden, mınıstrlerdiń óńirlerge saparyn tek ortalyq atqarýshy organdardyń saıttarynda ǵana emes, jergilikti deńgeıde, ásirese óńirlik BAQ-ta jáne áleýmettik jelilerdegi tanymal paraqsharlarda jıi jarııalaýdy qamtamasyz etken jón. Úshinshiden, Úkimet qaýlysymen bekitilgen Keste mınıstrlerdiń ǵana halyqpen kezdesýlerin retteıdi. Jarlyq talaptaryna sáıkes, mınıstrlermen qatar, vıtse-mınıstrler men vedomstvo tóraǵalarynyń da óńirlerge shyǵýy qajet degen oıdamyz. Sondyqtan memlekettik organdar vıtse-mınıstrler men komıtet tóraǵalarynyń kezdesýleri jónindegi vedomstvolyq josparlardy bekitip, mınıstrlerdiń kezdesýlerimen qatar, AQDM-ge árbir kezdesý boıynsha esep bergeni durys degen oıdamyz», - dedi Darhan Qydyráli.
Budan buryn habarlanǵandaı, Úkimette ortalyq organdar basshylarynyń halyqpen kezdesý qorytyndylary jarııalandy.
