Mınıstrlerdiń aılyǵy qysqartylǵan memqyzmetshiler esebinen kóterildi me –Agenttik jaýap berdi

NUR-SULTAN. QazAqparat – QR Memlekettik qyzmet isteri agenttigi tóraǵasynyń orynbasary Marat Dáýeshov mınıstr Ashat Aımaǵambetovtiń úlken mólsherde syıaqy alǵany týraly aqparatqa qatysty pikir bildirdi, dep habarlaıdy QazAqparat tilshisi.

«Ákimder men mınıstrlerdiń jalaqysy 1 mln teńgeden 2 mln teńgege deıin óskenin jaqsy bilemiz. Byltyr memlekettik qyzmetshilerdiń sany 25 paıyzǵa deıin qysqardy. Ákimder men mınıstrlerdiń jalaqysy osy qysqartylǵan 25 paıyz memlekettik qyzmetshiniń esebinen kóterildi me?», -dep surady BAQ ókili ortalyq kommýnıkatsııalar qyzmetinde ótken brıfıngide.

Bul suraqqa QR Memlekettik qyzmet isteri agenttigi tóraǵasynyń orynbasary Marat Dáýeshov jaýap berdi.

«Memlekettik qyzmetshilerdi ońtaılandyrý jumystary qazir dep júrgizilýde. Osy jyldyń sońyna deıin 15 paıyzǵa deıin qysqartylady. Kelesi jyly 10 paıyzǵa deıin qysqartylady.

Al aılyqqa kelsek, jergilikti organdarda aılyq 90 paıyzǵa kóterildi», - dedi agenttik bashysynyń orynbasary.

Sondaı-aq, ol QR Bilim jáne ǵylym mınıstriniń byltyrǵy syıaqysy týraly pikir bildirdi.

«Byltyr mınıstr Ashat Aımaǵambetov 15 mln teńge kóleminde syıaqy aldy degen aqparat shyqty. Zań turǵysynan, memlekettik qyzmetshiniń etıkasy turǵysynan basshynyń ózine osynsha syıaqy alýy qanshalyqty durys?», - dep surady jýrnalıst.

«Memlekettik organda osyndaı ekonomııa (qarjy únemdeý– red.) bolsa, ondaı múmkin». – dep qysqa qaıyrdy Marat Dáýeshov.