Mınıstrler jazǵy demalysqa shyqpaı, jylytý maýsymyna daıyndalady

ASTANA. QazAqparat – Jylytý maýsymyna daıyndyq aıasynda QR Energetıka jáne Ulttyq ekonomıka mınıstrleri jazǵy demalysqa shyqpaıdy. Al Indýstrııa jáne ınfraqurylymdyq damý mınıstri óz demalysyn Premer-Mınıstrmen kelisip úlgerdi, dep habarlaıdy QazAqparat tilshisi.

Keshe Memleket basshysy Qasym-Jomart Toqaev elordany damytý máseleleri jónindegi keńeste jylytý maýsymyna daıyndyqty qysqa deıin aıaqtaýdy tapsyrǵan edi.

«Ákimdik qyzmetkerleri, ásirese basshylyq osy jazda demalysqa shyqpaýy kerek. Qazir 2-3 apta demalysqa ketseńizder, muny dıversııa dep esepteńizder. Jumys kóp. Kúni-túni jumys isteý kerek», - dedi Qasym-Jomart Toqaev.

QR Ulttyq ekonomıka mınıstri Álibek Qýantyrov ótken jyly da, bıyl da eshqandaı demalysqa shyqpaıtynyn aıtty.

«Men de áli demalysqa barmaıtyn shyǵarmyn. Úkimet kestesi tıisti túrde bekitiledi», - dep tolyqtyrdy QR Energetıka mınıstri Almasadam Sátqalıev.

Al Indýstrııa jáne ınfraqurylymdyq damý mınıstri Marat Qarabaev tilshiler suraǵyna bergen jaýabynda Prezıdenttiń tapsyrmasy Astana ákimi apparatyna qatysty ekenin atap ótti.

«Demalysqa jalpy jospar boıynsha baramyn, muny Premer-Mınıstr maquldady. Jylytý maýsymyna qaraı ortalyq memlekettik organ – naqty Indýstrııa jáne ınfraqurylymdyq damý mınıstrligi daıyndyq úshin barlyq qajetti jumystardy jasady», - dep jaýap berdi mınıstr.

Aıta keteıik, búgin QR Premer-Mınıstri Álıhan Smaıylov birde-bir óńir jylytý maýsymynda apattarǵa jol bermeýi kerektigin aıtty.